Usengasinda ekuxotshweni umsebenzi umqeqetshi weqembu lomdlalo wenguqu ele Triangle uBiggie Zuze ngemva kokuba iqembu lakhe liphakamise inkezo ye One Wallet ngeNsonto.
Iqembu le Triangle liphakamise inkezo ye One Wallet ngemva kokunqoba elikwenze ele Dynamos emdlalweni obusenkundleni ye National Sports ngeNsonto.
Limpumela ilakho ukuguqula ingqondo zenkokheli zeqembu le Triangle zona ezibikwa bezicabanga ukuxotsha umqeqetshi weqembu uBiggie Zuze umsebenzi ngesizatho sokuba leliqembu kaliqhubi kuhle kumidlalo yeligi.
Iqembu le Triangle lihlezi kundawo yetshumi lambili engalaneni yemiklomelo kusigaba se PSL okutsho ukuba kuzamele libophe liqine ukuze lisinde engozini yokugunyulwa kusigaba saphezulu.
Abasiki bebunda bathi iqembu le Triangle bephakathi kwemizamo eyokuhuga umqeqetshi owake waqeqetsha iqembu le sizwe elama Warriors kanye lamaqembu agoqela iHighlanders, i CAPS United kanye le Motor Action uRahman Gumbo ukuba azothatha indawo ka Zuze kodwa ukuphumelela kweqembu le Triangle kunkezo ye One Wallet kulakho ukupha inkokheli zeqembu isibindi sokwala belokhu besebenza laye uZuze.
Kolunye udaba olumayelana lokuxotshwa kwabaqeqetshi umsebenzi obengumqeqetshi weqembu le Highlanders uKelvin Kaindu ubikwa ebuyele elizweni lakubo ele Zambia kulandela ingxabangxoza eqale ngemva kokudliwa kwe Bosso liqembu le ZPC Kariba ensukwini ezedluleyo.
UKaindu ucatshangelwa ukuba uyedinga usizo kunhlanganiso ye Football Association of Zambia mayelana lokungezwani kwakhe leqembu le Highlanders.
……………………………………………………………………………………………………………………………………………………………………………………………………………………
Sikhangele umdlalo wenguqu kwamanye amazwe;
Elizweni le South Africa amaqembu athi ele Kaizer Chiefs, ele Mamelodi Sundowns, ele AmaZulu, ele Platinum Stars, ele Wits University, ele Supersport, ele Orlando Pirates kanye lele Ajax Cape Town asefinyelele kusigaba se quarter – final kumncintiswano we Telkom Knockout ngemva kokunqoba akwenze kumidlalo eyesigaba sakuqala esomncintiswano ebikhona ngempelaviki edluleyo.
Ngase Ngilandi iqembu le Chelsea likhuphule inani lemiklomelo yalo kusizini yalonyaka yaya kwelitshumi lathobamunwe munye ngemva kokunqoba elikwenze ele Arsenal ngoMgqibelo.
Iqembu le Chelsea litshiye elihlezi kundawo yesibili ele Manchester City ngemiklomelo emihlanu.
Elizweni le Spain iqembu le Barcelona lalo likhokhela ngemiklomelo elitshumi lathoba munwe munye ngemva kwemidlalo eyisikhombisa ikanti lona litshiya elihlezi kundawo yesibili ele Valencia ngemiklomelo emibili.
KwelamaJelimana iqembu le Bayern Munich likhokhela ngemiklomelo elitshumi lesikhombisa ngemva kokudlala imidlalo eyisikhombisa njalo litshiye iqembu elihlezi kundawo yesibili ele TSG Hoffeinheim ngemiklomelo emine.
Iqembu le Juventus yilo elihamba phambili elizweni lamaTaliyana njengoba lihlezi phezu kwengalane lilemiklomelo elitshumi lathoba minwe mbili ngemva kokudlala imidlalo eyisithupha.
Kundawo yesibili kuhlezi iqembu le AS Roma lona elilemiklomelo elitshumi lanhlanu njalo elinqotshwe okwakuqala kulisizini litshaywa ngele Juventus ngempelaviki edluleyo.