Izifundi Zikhala Ngenhlawulo Eqongileyo YeCentre Fee

BULAWAYO —  Izikolo kanye lamakolitshi asethwalise nzima abafundi abakhangelele ukuloba imihloliso yebanga le ‘O’ le ‘A’ level ngenyanga kaNhlangula ngokubahlawulisa izimali zokubhalela kizo, ezama Centre Fees eziphezu kwamadola angamatshumi amane-$40, phezu kweyemihloliso edingwa luhlangothi olukhangela ngokulotshwa kwemihloliso – iZimbabwe Schools Examinations Council.

Abafundi, ikakhulu abangaphumelelanga emihlolisweni yanyakenye yibo ababambe ingqamu ngasebukhalini bayo ngoba bengasela izikolo abafunda kuzo abangabhalela khona ngaphandle kwenhlawulo le ephezulu.

Amanye amakolitshi la abhadalisa amatshumi amane amadollar $40, amanye njalo amatshumi ayisithupha-$60 kuthi amanye abhadalise amadola alitshumi lanhlanu ngamhloliso wesifundo sinye.

Inhlawulo ye ZIMSEC ngamadola alitshumi lambili - $12 mhloliso ngamunye ku ‘O’ level lamadola angamatshumi amabili lane - $24 ku ‘A’ level, kungakhathalekile ukuthi umuntu ubhala okwakuqala kumbe uyaphinda. Abafundi abangasizizalwane zakuleli bahlawula amadola angamatshumi amathathu lanhlanu -$35 ku ‘O’ level lamadola angamatshumi amahlanu lanhlanu-$55 ku ‘A’ level.

Kubika intathelizindaba yeStudio Seven uNothando Sibanda osipha loludaba ekoBulawayo.

Udaba lukaNothando Sibanda lwenhlawulo yamaCentre Fees