Inengi lezisebenzi lithi alilathemba lokuthi uhlelo lukahulumende olokwabela izisebenzi ezaxotshwa umsebenzi mahlayana kulandela isinqumo somthethwandaba ophezulu owe Supreme Court ngomnyaka odluleyo luzaphumelela ngoba kungakhulunyiswanga lazo ngaloludaba.
Umphathintambo kahulumende obona ngokuphathelane lezisebenzi uNkosikazi Prisca Mupfumira ubikwa esithi uhulumende useqoqe imali engamadola ayizigidi ezinhlanu-five million dollars, njalo uzasebenza lenhlanganiso ye Tripartite Negotiating Forum ukuyabela izisebenzi lezi, ngenjongo yokuthi zisungule amabhizimusi amancinyane.
Ngenyanga kaNtulikazi nyakenye, umthethwandaba we Supreme Court wanquma ukuthi abaqhatshi balelungelo lokumisa izisebenzi umsebenzi ngemva kokubatshela inhloso yabo kusasele inyanga ezintathu.
Lokhu kwabangelwa ukuxotshwa kwezisebenzi ezinengi ngoba amankampani esithi awasenelisi ukuzihlawula ngenxa yokubhidlika komnotho welizwe.
Ukuhlaziya loludaba, sixoxe loMnu. Ambrose Sibindi, isiphathamandla senhlanganiso elwela amalungelo ezisebenzi eye Zimbabwe Congress of Trade Unions. UMnu. Sibindi uthi imali le ayisoze yenele izisebenzi zonke ezaxotshwayo njalo akulabufakazi obukhomba ukuthi uhlelo lolu luzaqutshwa ngemfanelo.
Your browser doesn’t support HTML5
Ingxoxo LoMnu. Ambrose Sibindi