Izizalwane zeZimbabwe kwele South Africa zithi zithokoze kakhulu kulandela ukukhitshwa kukamongameli Mugabe esikhundleni sokukhokhela ibandla leZanu PF okulinyathelo eselivule indlela yokuthi ethulwe esikhundleni sokuba ngumongameli welizwe.
Ngemva kokufola ezitaledeni zePretoria ngoMgqibelo izizalwane zeZimbabwe zisithi uMugabe akehle esihlalweni kungene abanye, lamhlanje zithi zithabe zimanzi te kulandela ukwethulwa kwakhe esikhundleni zokukhokhela iZanu pf.
Isizalwane seZimbabwe uNkosazana Minenhle Nyathi uthi leyinto osekukade bayilindela ebonga kakhulu ibutho ngokuletha isimo esesenze ukuthi uMugabe ehliswe esikhundleni.
"I’m excited. Ngijabulile kakhulu because somebody seze wasukuma ukuthi kukhulunywe ukuthi uMugabe kahambe. I have been tired of this guy. I have been in exile for the last ten years. And I’m quite happy ngento eyenzakalayo."
Esinye njalo isizalwane seZimbabwe umnumnzana Khulekani Dube uthi le yinto esinikeze ithemba lokuthi laye ngelinye ilanga uzabuyela eZimbabwe ayephila ekhululekile hatshi la eSouth Africa ophila ekhangelwa njengomuntu wokuza.
"Ngithola ukujabula kakhulu esimeni sokuphuma kukamdala phezu kweminyaka emingaka ekade aphethe. Sesikhalelanje loba utshintsho phezu kokusokola okungaka ekade sesikuphila sisokola."
Njengoba iZanu pf isikhethe umnumnzana Mnangagwa njengomkhokheli wayo omutsha, okusobala ukuthi uzaba ngumongameli welizwe maduze, inengi kweleSouth Africa likhuthaza leli bandla ukuthi lingaphindi ukwenza izinto ezenza umongameli Mugabe abuse okweminyaka engamatshumi amathathu lesikhombisa.