Inhlanganiso yeAmnesty International emhlubulweni wezanzi yezwekazi le Africa ithi kumele uhulumende we South Africa anike abahlezi elizweni lakhe ngokungekho emthethweni imvumo yokudinga usizo lwamagqwetha kudaba lokubotshwa kwabo kunsukwana ezedluleyo ngaphansi kohlelo lwe Operation Fiela kumbe Thanyela, olokuphindisela emuva abavela kwamanye amazwe.
Ekhuluma leStudio 7 eseJohannesburg kwele South Africa , uMnu. Deprose Muchena isiphathamandla salinhlanganiso uthe kufanele uhulumende walelolizwe amise uhlelo lwe Operation Fiela ngoba luyazifananela lolweOperation Murambatsvina olwaqhutshwa eZimbabwe, olwasolwa ngabanengi ukuthi lwephula amalungelo oluntu.
Ababotshiweyo kwele South Africa bagoqela izizalwane zeZimbabwe njalo balokhu besentolongweni ngemva kokuba umthethwandaba walelolizwe unqume ukuthi bengaphindiselwa emazweni abadabuka kuwo kulandela isicelo samagqwetha alwela ilungelo loluntu.
USithandekile Mhlanga oweStudio 7 uxoxe loMnu. Ngqabutho Mabhena, isiphathamandla senhlanganiso elwela amalungelo ezizalwane zeZimbabwe ezihlala kwele South Africa, eye Zimbabwe Community in South Africa, ukuze sizwe ukuthi kwenzakalani kwele South Africa ngaloludaba.
Your browser doesn’t support HTML5
Ingxoxo loMnu. Ngqabutho Mabhena