Ukusetshenziswa kwemali yakwele China, iYuan, sekuzaqiniswa kulandela ukwesulwa kwesikwelede se $40 million yilizwe lelo.
Lanxa imali le yayivele isithiwe kumele isitshenziswe iphephandaba le The Herald lithi uhulumende usezafaka imigoqo yokuthi limali yamukelwe lokusiwa emabhanga nxa umuntu elayo.
Usibalukhulu weRBZ, uDr John Mangudya
Kodwa usibalukhulu webhanga lesizwe, iReserve Bank, uMnu. John Mangudya utshele iStudio Seven ukuthi akula okuguqukileyo kuloludaba ngoba kudala iYuan yathiwa isetshenziswe kunye lenye imali yakwamanye amazwe ebalisa, idola leMelika, iRand lakwele South Africa kunye lenye eyamanye amazwe ambalwa.
Ukuhlaziya loludaba sixoxe lengcwethi ecubungula ezomnotho, uMnu. Rejoice Ngwenya othi lanxa uhulumende wayethe limali kumele isebenze kathesi bafuna ukukhuthaza ukusetshenziswa kwayo.
Ingcwethi ecubungula ezenotho uMnu. Rejoice Ngwenya
“Abafuna ukukwenza yikuthi njengoba vele bejonge ukukhangela empumalanga bayabe besithi ama Chinese bengezwa ukuthi eZimbabwe sekusetshenziswa iYuan bazeza ngobunengi bezovakatsha,” kutsho uNgwenya.
Wengezelele esithi okunye okuzenza uzulu engayamukeli limali yikwesabela ukuthi bengaba layo bazehluleka ukuthi bayelayo kwamanye amazwe angomakhelwane.
Isisindo se Yuan kasandanga ukwehla nxa iqathaniswa lamanye amazwe kodwa uhulumende wakwele China uke wasehlisa ngabomu ingcwethi kwezomnotho welizwe zathi ele China lifuna ukuthi impahla ezithengwa kwamanye amazwe zibe lentengo ephansi.
UNgwenya uthi : “Ngibona angani kuzakuba lodubo phambilini sekulaphaya abantu bengakayizwisisi. Njengami nginje angazi ukuthi ngingaya kwamanye amazwe bayiphatha kanjani iYuan.”
Your browser doesn’t support HTML5
Ingxoxo loMnu. Rejoice Ngwenya