Kubhubhe abantu abangamatshumi ayisithupha, 60, ngeCovid-19 eZimbabwe ngoLwesithathu.
Ugatsha olubona ngezempilakahle luthi kutholakale njalo abafika phose inkulungwane ezimbili, 1,856, belomkhuhlane lo.
Lokhu kukhweze inani lasebefile laya kunkulungwane ezintathu ezilamakhulu edlula amathathu, 3,340.
Asebebanjwe lumkhuhlane bonke sebephezu kwenkulungwane ezilikhulu, 103,567.
Abahlatshwe ijekiseni yakuqala yokuvikela iCoronavirus ngoLwesithathu bedlula inkulungwane ezingamatshumi amane, 40,135.
Abahlatshwe eyesibili bazinkulungwane ezingamatshumi phose amabili, 18,466.
Asebehlatshwe eyakuqala bonke sebefika kusigidi esilengxenye, 1,562,285 kuthi asebehlatshwe eyesibili njalo ingeyokucina sebezinkulungwane ezingamakhulu edlula ayisikhombisa, 713,131.
Uhulumende uthi uzakwamukela amajekiseni azinkulungwane ezingamakhulu ayisikhombisa, 700,000, athengwe kweleChina namuhla.
Izolo kufike amanye azinkulungwane ezingamakhulu ayisitshiyangalombili, 800,000.
Isikhulumeli sikahulumende uMnu Nick Mangwana - eloba enkundleni yeTwitter - uthe nxa kubalwa lalawa azafika namuhla, ilizwe selithole amajekiseni ayizigidi phose eziyisikhombisa, 6,7 million.
Wengeze wathi kulamanye njalo asebhadalelwe ayizigidi ezinhlanu, 5 million, akhangelelwe ukufika elizweni phakathi kwenyanga ezayo.
Isiphathamandla senhlanganiso yeBulawayo Progressive Residents Association uMnu Thembelani Dube utshele iStudio 7 ukuthi njengoba amajekiseni ekhanya esiba manengi, abantu labo kumele baphakamele phezulu bayehlatshwa.
Your browser doesn’t support HTML5
Ingxoxo loMnu Thembelani Dube
Kusenjalo, ikhansili yakoBulawayo ithi yenza yonke imizamo yokwenqabela ukumemetheka kweCovid-19 okugoqela ukufafaza izindlu lapho okuyabe kubhubhele khona umuntu ngalumkhuhlane - ngomuthi obulala igciwane leCoronavirus.
Umgcinisihlalo wekhomithi ebona ngezempilakahle kulikhansili njalo engukhansila kaWard 10, Entumbane, uNkosikazi Sinikiwe Mutanda utshele iStudio 7 ukuthi bathatha amanyathelo lawa ngoba umkhuhlane lo usubhahe kakhulu kulelidolobho.
Your browser doesn’t support HTML5
Ingxoxo loKhansila Sinikiwe Mutanda