Kugqitshwa Umhlangano weUNWTO General Assembly

WASHINGTON —  Umhlangano we United Nations World Tourism Organization (UNWTO) General Assembly obuqhutshwa yiZimbabwe le Zambia kusukela ngeviki edluleyo ugqitshwe ngoLwesine eLivingstone eZambia ngemva kokuvalwa ngokusemthethweni ngumongameli we Zambia uMnu. Michael Sata.

Ekhuluma kulumhlangano izolo, umongameli Mugabe usole kakhulu amazwe aphetsheya esithi abengafuni ukuthi uphumelele ngoba ethusele abantu ngokuthi bazalimala kulumhlangano.

Izikhulumi ezitshiyeneyo ezigoqela umphathintambo wezokwethekelelana uMnu. Walter Mzembi, kanye lesiphathamandla se UNWTO uMnu. Talib Rifai zincome indlela eleZimbabwe eliphathe ngayo lumhlangano zagcizelele ukuthi ezokwethekelelana ziyathuthuka kwele Africa.

Esinye sezinqumo ezimqoka esithethwe kulumhlangano ngesokuthi kwesulwe incwadi zokuhambisa ezama visa kumazwe angaphansi komanyano we UNWTO.

Ukuze sihlaziye okunengi ngaloludaba, sixoxe loMnu. Nkosilathi Jiyane, owayengumayor wedolobho le Victoria Falls njalo engumgcinisihlalo we UNWTO Local Organizing Committee, endawonye loMnu. Gift Mabhena, owayemela iHwange West edale lephalamende.

UMnu. Mabhena usungula lingxoxo ngokugcizelela ukuthi eleZimbabwe lithuthukisiwe ngokuphiwa inhlonipho yokuqhuba lumhlangano.

Ingxoxo LoMnu. Nkosilathi Jiyane Endawonye LoMnu. Gift Mabhena

Umhlangano lo, ongowamatshumi amabili kunhlanganiso yeUNWTO uzaqhutshwa kwele Cambodia ngomnyaka ozayo.