Kuqhamuke udlakela olwesabekayo phakathi kwamapholisa labasakhulayo beMDC-T abatshengisele ezitaladeni zeHarare ngoLwesithathu besola ucuku lwamapholisa lombuso weZanu PF.
Amapholisa ahlasele abasakhulayo laba ngesikhathi belubhekise emahofisini kamphathintambo obona ngendaba zasekhaya uMnu Ignatious Chombo ukuyakwethula izikhalazo zabo phezu kocuku lwamapholisa.
Abasakhulayo laba baphindisele batshisa imota yamapholisa kanye leyomsakazo kahulumende oweZBC babulala amafasitela ezakhiwo ezinengi ezigoqela isitolo sikaMnu Phelekezela Mphoko eseChopies.
Ababone ukulwisana lokhu kusenzakala bafakazele umsakazo lo ukuthi kugqekezwe esitolo sikaMphoko lesi kwantshontsha ukudla lokunye okutshiyeneyo.
Isikhulumeli samapholisa uSenior Assistant Commissioner Charity Charamba uthi kubotshwe abantu abangamatshumi ayisithupha phezu kodlakela lolu.
Indawo ezinengi edolobheni zicine zivalwa emini ngoba bekungasahambeki ngoba amapholisa ebesetshaya wonke umuntu njalo ejikela abantu ngentuthu ehitshayo.
Your browser doesn’t support HTML5
Udaba Lusethulwa nguMavis Gama