UMongameli Emmerson Mnangagwa, abaphathintambo bakahulumende abakudale leCabinet, amalunga edale lephalamende lozulu jikelele bathanyele njalo badobha izibi eHarare ngoLwesihlanu phansi kohlelo olweNational Clean-Up Campaign.
UMongameli Emmerson Mnangagwa uvukele esibhedlela seParirenyatwa Hospital ngoLwesihlanu lamalunga awe cabinet yakhe baqala ukulungilungisa leyondawo lapho abathanyele khona izibi.
Ekhuluma ngemva kokugqiba umsebenzi wangoLwesihlanu uMnangagwa uthe loluhlelo lukhanya luthakazalelwa ngabanengi njengoba lukhuthaza ukulondolozwa kwempilakahle lenhlalakahle.
Uqhubeke ethi wasungula loluhlelo kunyanga ezintathu ezedluleyo ngenhloso yokukhumbuza abantu ukuthi bahlale lokulondoloza indawo abakizo zihlanzekile.
UMnangagwa uphinde wathi abantu kumele batshiyane lomkhuba wokulahlela izibi ndawana yonke njalo bafunde isibonelo esihle sokwenzakal kwamanye amazwe afana labo Rwanda lapho okungavunyelwa ukuthi abantu bafulele izindlu ngotshani kumbe ukuhamba ngenyawo umuntu engaqokanga izihlangu.
Umpathintambo wezemidlalo uKirsty Coventry eseHarare
Umpathintambo wezemidlalo uNkosazana Kirsty Coventry, kanye lezisebenzi zogatsha lwakhe baqalele kumgwaqo uSimon Muzenda Street baphetha sebese Africa Unity Square lapho abacine bemanyana lezisebenzi zesitolo seTM Supermarket lezehwetheleni yeMeikles Hotel.
UKirsty laye uveze injabulo enkulu ngosekelo aluthole lapho ekhokhela izisebenzi zogatsha lwakhe kuhlelo lwangoLwesihlanu.
UMayor Herbert Gomba wedolobho leHarare kuhlelo lweClean Up
Abanye abenelise ukuphaheka kuhlelo lwanamhlanje bagoqela izisebenzi zenkampani yezindaba eye Zimbabwe Newspapers, umayor wedolobho le Harare, uMnu. Herbet Gomba, omanyane lamakhansila akhe lezisebenzi zonke zikamanisiphala, izisebenzi zezitolo ze OK ezisedolobheni lonke kanye lasemizini ehlala abanenngi enjenge Highfields.
UMnangagwa usungule lolu hlelo kunyanga ezintathu ezedluleyo olweNational Clean-Up Campaign, oluhlose ukukhuthaza amadolobho elizweni lonke ehlanzekile abantu balondoloze impilakahle lenhlalakahle enhle, luqhutshwa ngolwesihlanu lwakuqala lwenyanga zonke.
Your browser doesn’t support HTML5
Udaba lohlelo olwe National Clean Up olukhokhelwa nguMongameli Emmerson Mnangagwa