UMqonidsi wenhlanganiso yakoBulawayo yabasakhulayo abangasebenziyo iEducation and Unemployed Youths Forum of Zimbabwe Trust, uMnunzana Zenzo Nyoni, usenikeze uHulumende weZimbabwe amaviki amabili ukuba ukwakhiwa kwendawo yamavinkili, imall, eGodini kuqale andubana bathathe amanyathelo angawavezanga athi azayangisa uhulumende.
UMqondisi walinhlanganiso, uMnunzana Zenzo Nyoni, uthi imisebenzi uhulumende ayithembisa abantu phambilini kokhetho abakayiboni.
Umphathintambo wezabelo, uMnu. Saviour Kasukuwere lonobhala wogatsha lwakhe, uMnu. George Mlilo babikwa bemise ukwakhiwa kwe mall le besithi inkampani ye Terraccorta ebimele yenze lumsebenzi yaphiwa lelithuba ngudlu.
UNyoni uthi kanti vele kungani uHulumende emisa iKhansili yakoBulawayo ukuba ilethe intuthuko ethi kungani uhulumende eqale walinda ukuqala komsebenzi sekusele amalanga ambalwa ukuba uBulawayo laye athuthuke abe semisa umsebenzi.
UMnu. Nyoni ubike ukuba intuthuko ezakoBulawayo inkulu njalo inengi labontanga alisebenzi ngoba isimo selizwe simi kubi.
Omunye wabasakhulayo uNdodana Moyo ukhuthaze uHulumende ukuba bazi ukuba ontanga bahluphekile njalo abasoze bavumele abantu abasuka esigodlweni, eHarare, bezolawula ngentuthuko yakoBulawayo.
Omunye njalo osakhulayo, uSiduduzile Mathonsi uchaze ukuba impilo inzima osekubangele ukuthi amantombazana amanengi athengise umzimba ngokuzama ukudinga imali.
Ubike ukuba bebesebelethemba lokuba bazathola imisebenzi kodwa sebedana ngenyathelo likahulumende elokumisa ukwakhiwa kwe mall eGodini.
ABantu abadlula inkulungwane eyodwa bakhangelele ukuqhatshwa ekwakhiweni kwemall le ngemali eyizigidi ezingamatshumi ayisithupha, i$60 million, njalo izakhamizi ezinengi zithi akuqhatshwe yena hatshi abantu abasuka kwezinye izabelo bazobathathela umsebenzi.
Your browser doesn’t support HTML5
Udaba Silethulelwa nguNompumelelo Moyo
Ukuhlaziya lolu daba upraxedes jeremiah westudio 7 uxoxe loMnu. Zenzele Ndebele omunye wabalwela amalungelo oluntu emanyene lomnumzana Ambrose Sibindi isiphathamandla senhlanganiso yeBulawayo Progressive Residents Association abathi abezombusazwe yibo asebefuna ukuphambanisa uhlelo oluhle kangaka oluletha inthuthuko koBulawayo. Osungula lingxoxo kunguNdebele.