Uhulumende weMelika ubambisane lekolitshi yemfundo yaphezulu eyeNational University of Science and Technology bavula okusemthethweni amawofisi aweNUST American Space koBulawayo ngoLwesithathu.
Ehlelweni oluthethe iminyaka eyedlula emibili, uhulumende weMelika usebenzise inkulungwane ezingamakhulu phose amaththu zamadola -$274,000 ekwakheni isiphala samabhuku lenhlelo ezehlukeneyo ejonge ukusiza abafundi, abacubunguli lenhlanganiso ezitsheyeneyo.
Evula okusemthethweni indlu yeNUST American Space, ummeli weMelika eZimbabwe, uAmbassador Harry Thomas Jnr. uchaze ukuba kuyajabulisa ukubona intuthuko engaka koBulawayo.
UAmbassador Thomas Jnr. uthe wonke amakolitshi lezifundi balelungelo lokusebenzisa iNUST American Space ngobunono obuphezulu ngoba imitshina yakulezi’nsuku lengwalo ziyatholakala esiphaleni lesi.
INUST American Space itholakala kuJason Moyo lo4th Avenue emawofisini eNUST Technopark koBulawayo njalo inhlelo ezehlukeneyo zizaqhutshelwa kuleyondawo kusiya ngokuthi yiziphi abafundi labacubunguli abafuna ziqhutshwe besebenzelana labafundi bakwamanye amazwe.
Obambele uVice Chancellor weNUST, uProfessor Samson Sibanda, uthe uyathokoza ngale indawo ngoba izakuba ngumthombo wemfundo lembiko kuye wonke umuntu ofisa ukuyisebenzisa ngenhloso eqotho.
Umqondisi wezifundo zeCommerce eNUST uMnu. Milton Web Ndlovu uvumelane loSibanda esithi ngempela abafundi beNUST lamanye amakolitshi sebezafumana ukufunda okulula.
Wengeze esithi bekusibanzima ukuba abafundi bafinyelele imitshina yakulezi insuku ekuzameni kwabo ukuziqalela inhlelo zabo kodwa ngenxa yeNUST American Space ukuthuthuka kwabafundi sekuzaphumelele.
Your browser doesn’t support HTML5
Bekugidwa Kuvulwa Amawofisi eAmerican Corner
UTshalima wezemfundo yentathelizindaba eNUST, uMnu. Thabani Mpofu, uthe ngempela abafundela lumsebenzi eNUST sebezaqala inhlelo zabo kuhle ngoba yonke into ebikade isilela isikhona.
Osanda kuvela kweleMelika ngenhlelo zokuzithuthukisa uMnu. Butholezwe Nyathi uthi uyathokoza ngoba sekulendawo elesikhala esibanzi sokuba basebenzele njalo baqhubeke behlangana labanye abakwamanye amazwe lula.
INUST American Space, iqale iyiAmerican Corner esebenzela esiphaleni samabhuku eseBulawayo Public Library njalo okwamanje isithole indawo enkulu yokusebenzela elezindlu ezinkulu njalo zilempahla yokusebenzisa yakulezi insuku.
Your browser doesn’t support HTML5
Udaba Esilethulelwe NguNompumelelo Moyo
Uhulumende weMelika ulendawo ezine elizweni ujonge ukuthuthukisa impilo yeZimbabwe kwezomnotho, ezemfundo, ezocwaningo lokunye okuhlukeneyo.
Izindlu zemfundo lezi zibalisa iAmerican Corner eMutare, iNUST American Space, iTurners memorial Library eGweru leInformation Resource Centre esigodwelni sommeli weMelika eZimbabwe eHarare.