Abebandla lezombusazwe elisanda kubunjwa ele African Democratic Party – ADP baveza ukuba uzulu weZimbabwe nguye olomlandu wokuyekela umumo wezinto uwonakala kulokudinga indlela zokulungisisa inkinga ilizwe elibhekane layo bethi kungumsebenzi wakhe wonke umuntu ukuguqula isimo kwezomnotho welizwe.
Inkokheli yalelibandla le ADP ikhuthaza zulu ukuba aqhubekisele phambili impi yomkhankaso wombuso wenengi, osungulwe ngumkhokheli welinye lamacele e MDC, umnumzana Morgan Tsvangirayi, okuzakwenza ande amabandla ezombusazwe elizweni, lulungiswe lodaba lweGukurahundi, luphele kokuphela, isithi ngokunye okungaphathisa ukuletha ukuthula okupheleleyo elizweni.
Umkhokheli walelibandla, uMfundisi Marcellina Chikasha, uthi sesifikile isikhathi sokuba umuntu wonke azinuke amakhwapha, avume ukuba uyekele into zisonakala ekhangele, wavumela ubusela, ukuvalwa kwamankampani, ukungathembeki kanye lenkokheli ezilobuhwaba, wangabi landaba lomonakalo obusenziwa yilabo abaphethe intambo zombuso.
Unkosikazi Chikasha yena okhokhela njalo ibandla lezokholo ele Joy Unspeakable Ministries,njalo wafundela umsebenzi wokuba ngu Accountant, uthi ungene kwezombuzwe ngoba ebiziwe wasabela njalo ibandla lakhe ligxile kakhulu kunkolo zesiKhristu.
Loku kusekelwe ngomunye wenkokheli ebandleni le ADP obekulomhlangano lentathelizindaba owenzelwe e Media Centre e Harare lamuhla, engu nobhala Jikelele kilo unkosikazi Betty Moyo.
Uthi unkosikazi Moyo, akusizi lutho ukuba ilizwe lenze ingani akukho okwaphosiswa kudaba zokuhlukuluzana kwabantu ngezizatho ezehlukeneyo osekuqhubekisele phambili ukufuthelana lenzondano phakathi kukazulu eZimbabwe okubalisa olwezehlakalo zeGukurahundi.
Abebandla leli, elibunjwe ngenyanga kaMabasa lonyaka, bathi kabakalungiseli ukungena ku khetho lwama bi-elections kodwa bezancintisa kukhetho luka 2018. Bathi sebesezigabeni ezine okubalisa i Bulawayo, Harare, Mashonaland Central kanye le Manicaland njalo sebenze umhlangano wabo wakuqala omkhulu owe Rally, koZvimba e Mashonaland West.
Lithi lelibandala, lizakuphatheka kunkulumo labamazwe angentshonalanga, nxa seliwuthethe umbuso, ukukhankasela ukususwa kwezijeziso zomnotho ezabekelwa eleZimbabwe.
Lawo mazwe azibekayo ecatsha ngomunwe nxa ethi ziqondiswe kunkokheli yeZanu PF, ikanti inkokheli kulelibandla le ADP zithi iqiniso yikuba ziphazamisa inhlalakahle kazulu wonke jikelele lokubuyisela muva inhlelo zikahulumende emisebenzini yokuntuthukisa inotho yelizwe.
Okwamanje lithi lelibandla, kaliyi kumanyana lamanye amabandla aphikisayo, ukubumba ibandla linye eliphikisayo njengalokho okukhankaselwa ngamanye afana lele MDC elikhokhelwa ngumnumzana Morgan Tsvangirayi.