Amabandla aphikisayo athi ilunga leZanu PF uMnu Phillip Chiyangwa kamelanga avunyelwe ukuncintisa kukhetho lokudinga umkhokheli wenhlanganiso yenguqu iZimbabwe Football Association (ZIFA).
Athi abezombusazwe kabamelanga bangelele kundaba zenguqu.
Umkhokheli weMDC uMnu Welshman Ncube uthi ukuvumela uChiyangwa ekhokhela iZIFA kuzadiliza ezenguqu ngamandla ngoba engela lwazi ngomdlalo wenguqu.
UMnu Chiyangwa, yena olilunga leZanu PF, uzancintisana labathathu abathi uMnu Trevor Carlisie Juul, uMnu James Takavada loMnu Leslie Gwindi.
Amazwi kaNcube agcizelelwe ngumsekeli wesikhulumeli seMDC-T uNkosazana Thabitha Khumalo.
"Siyakusola kakhulu lokhu ngoba ungakhangela esikhathini esinengi eZimbabwe lapho okungenela khona abantu bombanganwe kwezenguqu, ikakhulu abeZanu PF, kabangeneli ukuyalungisa, bangenela ukuyadiliza," kutsho uMaKhumalo.
"UChiyangwa akulalutho alwaziyo ngomdlalo wenguqu. Inhlanganiso yeZIFA kumele ikhokhelwe ngabantu abalo lwazi ngezenguqu kuphela."
Your browser doesn’t support HTML5
Ingxoxo loNkosazana Thabitha Khumalo