Amaqembu amela inhlanganiso ye Highlanders kumidlalo etshiyeneyo asethole usekelo lwempahla zokusebenzisa oluvela kunhlanganiso ye First Mobile Sports Academy esebenzela elizweni lase Canada kanye leZimbabwe.
Ekhuluma ngemva kokuqhubela iziphathamandla zeqembu le Highlanders impahla ezivele elizweni le Canada, umgcinisihlalo wogatsha lwe First Mobile Sports Academy (FMSA) olutholakala edolobheni lako Bulawayo, uBekithemba Dube, uthe lesisipho siyingxenye yenhlelo zabo ezokuqinisa ubudlelwano leqembu le Highlanders.
“Sizama ukudinga ubudlelwano layo iHighlanders ngoba sile academy eCanada sibe njalo le academy kwele Zimbabwe njalo ngikhuluma kunje silabafana abane abavela ku academy yethu eCanada abazilolonga leqembu le Highlanders. Leyi ke yindlela yethu eyokubabonga ngokwamukela abafana bethu.”
Esemukela impahla lezi ezivele kwabe FMSA, unobhala jikelele weqembu le Highlanders, uEmmett Ndlovu, uthe vele iqembu le Highlanders liqhubekela phambili nje amanye ebhuluba ngoba lithola usekelo kanye losizo emphakathini.
“Ngimele iqembu le Highlanders ngithanda ukubonga lesisipho njalo siyisibonelo esokuba iqembu leli ngelabantu. Iqembu le Highlanders libunjwe ngomnyaka ka 1926 kodwa kungasilo sekelo esiluthola emphakathini ngabe kudala latshabalala.”
Impahla eziphiwe abe Highlanders yinhlanganiso ye FMSA ngezigoqela amabhola omdlalo wenguqu, amabhola awe basketball, rugby, netball kanye lamajazi abaqeqetshi beqembu lenguqu.
UDube uthe isifiso sabo ngesokuba baqhubekele phambili bephathisa abe Highlanders nxa bedinga uncedo.
“Ngokuya kwesikhathi sifisa ukuthi sibekhona nxa befuna uncedo, sibaphe lokhe uncedo abaye belufuna nxa sisenelisa.”
Kwele Zimbabwe inhlanganiso ye FMSA ilamaqembu abasakhulayo adlala kusigaba se Bulawayo Junior League ikanti lonyaka izakuba leqembu elizadlala kusigaba sika Division Three elibunjwa yilabo abadlali abangasenelisi ukudlala kwabasakhulayo.
Your browser doesn’t support HTML5
Udaba Esilethulwe NguJoseph Njanji