Ibandla leMDC-T lithi lizamangalela umsekeli kaMongameli welizwe uMnu Phelekezela Mphoko emthethwandaba phezu kwamazwi awethule ngoLwesihlanu angcolise igama likaMnu Morgan Tsvangirai.
Emazwini awethule kumabonakude weZBC, uMphoko uthe esalilunga leZanu PF, uTsvangirai waphatheka kumbuqazwe weGukurahundi.
Uthe njalo uTsvangirai ungomunye wabantu abacathamela owayengumkhokheli weZapu uMnu Joshua Nkomo eMasvingo bazama ukumbulala.
Ibandla leMDC-T lithi amazwe kaMphoko la angamanga awethule ngenjongo yokungcolise igama likaTsvangirai emphakathini.
Ngalokho, lithi uMphoko kumele ahlale elindele incwadi evela kumagqwetha kaTsvangirai eyokudinga ukugeziswa igama lakhe ngenhlawulo emthethwandaba.
Isikhulumeli sikaTsvangirai uMnu Luke Tamborinyoka wethule umbiko esithi uMphoko wayedakiwe eze ekhulume amazwe la.
“Esikhathini esizayo, abantu bakaMphoko kumele bamxwayise ukuthi angavumi ukuma phambi kwama-camera ekhuluma izinto ezinje, ikakhulu nxa kuyikuthi kukhona okudakayo akubhemileyo,” kutsho uTamborinyoka.
Umqoqi weMDC-T, uMnu. Abednico Bhebhe, laye uwalandule amazwe kaMphoko esithi kakwazi akukhulumayo.
Your browser doesn’t support HTML5
Ingxoxo loMnu Abednico Bhebhe