Ibandla leMDC-T lithi kalivumelani lemizamo kahulumende eyokuthi bonke abantwana besikolo kumele beqhube izifundo zeNational Youth Service.
Ekhuluma emkhosini wokuthakazelela ilanga lakhe lokuzalwa ngoMgqibelo, uMongameli Robert Mugabe uthe uhulumende uphakathi kokuqoqa loluhlelo.
Uthe wonke umntwana kumele efike kuzifundo ze“O” Level abe eseziqhubile izifundo zeYouth Service.
Uthi injongo yohlelo lolu ngeyokufundisa abasakhulayo imbali yeZimbabwe kanye lokwenza imisebenzi yezandla.
Uhlelo lweNational Youth Service luke lwaqhutshwa eminyakeni edluleyo kodwa abantu bebengabanjwa ngamandla ukuthi baphatheke.
Abanengi bayalusola loluhlelo besithi abasakhulayo abaqhube izifundo phansi kwalo bebesetshenziswa yiZanu PF ukuhlukuluza abamabandla aphikisayo.
Umsekeli wesikhulumeli seMDC-T uNkosazana Thabitha Khumalo ukhuthaze abazali ukuthi bengayamukeli imizamo kahulumende le.
Your browser doesn’t support HTML5
Ingxoxo loNkosazana Thabitha Khumalo
Kodwa umsekeli webandla leZanu PF uMnu Morris Ngwenya uthe akula lutho olubi ngaloluhlelo.
Your browser doesn’t support HTML5
Ingxoxo loMnu Morris Ngwenya
Kusenjalo, umgcinisihlalo wabatsha kubandla leZANU PF esigabeni seMatabeleland North, uMnu. Tamuka Nyoni utshele uSithandekile Mhlanga weStudio 7 ukuthi isigaba sakhe senelisile ukuqhuba kuhle idili lokunanza ukuzalwa kukamongameli Mugabe ngempelaviki, njalo ngoMvulo langoLwesibili amalunga ebandla lakhe ahlanza lapho obekuledili leli khona.
Your browser doesn’t support HTML5
Ingxoxo LoMnu. Tamuka Nyoni