Izisebenzi zenkampani kaLoliwe zithi zikhangelele ukuthi umqhatshi wazo uzazibhadala iholo lazo lonke endaweni yokuthi zibe zithola ingxenye yalo nyanga-zonke njengenhlalayenza kulandela ukutshengisela kwazo ngoMgqibelo odluleyo ngaloludaba.
Umthethwandaba waphezulu usanda ukupha izisebenzi lezi imvumo yokuthi zitshengisele ngemva kokuvinjelwa ngamapholisa ukwenza lokhu emadolobheni agoqela iBulawayo, Harare, Gweru, leMutare.
UMnu. Tamurai Moyo, umgcinisihlalo wenye yenhlanganiso yezisebenzi zikaLoliwe ezitshengiseleyo ngempelaviki i- Zimbabwe Amalgamated Railway Union utshele uSithandekile Mhlanga weStudio 7 ukuthi uhlelo lwabo luqhubeke kuhle kula amadolobho njalo amapholisa abaphethe ngemfanelo.
Your browser doesn’t support HTML5
Ingxoxo LoMnu. Tamurai Moyo
Kusenjalo, isikhulumi senkampani kaLoliwe uMnu. Fanuel Masikati usanda ukutshela iStudio 7 ukuthi ukuphumelela kwenkampani yakhe kulingana lomumo wezomnotho welizwe, njalo inkampani yakhe isebenza gadalala ukuthi izithuthukise ukwenzela ukuthi igcwalise imfanelo yazo kanye leyezisebenzi.