Amazwi kamongameli mugabe awokuthi abantu bezimbabwe basuthisekile kakhulu ngombuso wakhe njalo kabafuni asuke esihlalweni asedale inkulumo uzulu esithi kawasiloqiniso.
Ebuzwa zintathelizindaba ngoLwesibili eseJapan ukuthi uzatshiya nini isikhundla, uMugabe uthe kalaso isizatho sokwenza lokhu ngoba bemthakazelela abanengi.
UMongameli Mugabe, oleminyaka engamatshumi ayithoba munwe munye lanye, uphinde wazisa intathelizindaba lezi ukuthi nguye ozamela ibandla leZanu PF nxa umzimba wakhe uvuma, waphanga wathi okwakathesi usaseqine saka.
Ukuhlaziya loludaba uChris Gande weStudio Seven uxoxe lelunga ledale ye Central Committee yebandal leZanu PF, uMnu. Joseph Tshuma endawonye lesiphathamandla sebandla le Zapu, uMnu. Strike Ndlovu onguye osungula lingxoxa.
"Kuminyaka yonke edluleyo bekuqutshwa ukhetho ngendlela engalunganga. Okwakuqala yimithetho yokhetho, okwesibili yiZimbabwe Electoral Commission, okwesithathu bekulokwethuselwa kwabantu abavotayo," kutsho uNdlovu.
Uthi ngomnyaka ka 2008 kwakhanya sobala ukuthi uMongameli Mugabe wanqotshwa nguMnu. Morgan Tsvangirai kodwa kwaba lodlakela olwabangela ukuthi uTsvangirai angancintisi.
Kodwa uMnu. Tshuma yena uphikise lokhu esithi uMongameli Mugabe uqinisile ngoba uzulu wavotela uMongameli Mugabe kusukela ngomnyaka ka 2008.
"Bekubuya abantu abavela ngaphandle kwelizwe besithi konke kuhambe kahle njalo bavumelana lempumela ekhona," kutsho uTshuma.
UMkandla uthi kunengi okungaphathwa kahle kukhetho lonke ezifana le voters' roll lokunye okubangela ukuthi ukukhethwa kukaMongameli Mugabe kungathiwa kusemthethweni.
Your browser doesn’t support HTML5
Ingxoxo loMnu. Joseph Tshuma endaweni loMnu. Strike Mkandla