Ukutshengisela ngokungayi emsebenzini kwabantu belandela inkuthazo wabemikhankaso ethile esikhona eZimbabwe egoqela o#This Flag ekhokhelwa nguMfundisi Evan Mwarire, oTajamuka Sesijikile, leminye eminengi, kungaba lihlandla lakuqala lomvukela omkhulu elizweni abantu besithi sesidiniwe.
NgoLwesithathu umthethwandaba kaMantshi weHarare, unqume ukuthi uMawarire akhululwe ngoba ukubotshwa kwakhe kwephula ilungelo lakhe phansi kwesisekelo sombuso welizwe.
Kodwa ukuthi kuze kufikwe kuleso sinqumo akhululwe kuthethe ilanga lonke abantu belinde phandle komthethwandaba ukuze akhululwe.
Abanye ngababuza ukuthi kambe kungabe sokusitsho na ukuthi imithethwandaba isisenelisa ukuzisebenzela ingatshelwa okokwenza nguhulumende.
Ukuhlaziya konke lokhu uPraxedes Jeremiah oweStudio 7 uxoxe lomnumzana Lizwe Jamela oligqwetha lezamalungelo oluntu osebenza ephansi kwenhlanganiso ye Zimbabwe Lawyers For Human Rights ekoBulawayo, elengcwethi ecubungula ezombusazwe umnumzana Mandla Mkhwananzi oseIndiana eMelika.
UJamela uqale ngokuthi bona bayamukela ngenjabulo isinqumo esithethwe nguMantshi ekwahluleleni akwenze lapho kuthonisiswa uMawarire.
“Lokhu sokutshengisa ukuthi engxenye abemithethwandaba sebenelisa ukuzicabangela engatshelwa lutho kodwa ithemba sibili kalikho ukuthi lokhu kuzahle kuguqule inqondo zabo bonke abomthetho ngoba ayisizo zonke izinqumo ezilalelwa yinkokheli yelizwe bavame ukuzingananzi bazenzele intando”
Your browser doesn’t support HTML5
Ingxoxo loMnu. Lizwe Jamela loMnu. Mandla Mkhwananzi