Esethula umbiko wakhe omayalana lokuhlonitshwa kwelungelo likazulu lokukhetha akholwa kukho, esesigabeni se-Iowa, kweleMelika, unobhala wobudlelwano beMelika lamanye amazwe womhlaba, uSecretary of State Mike Pompeo, uthe inkululeko yokukhetha ukuthi umuntu ufuna ukulandela nkolo bani, lilungelo elimqoka elihamba phambili kusisekelo sombuso weMelika.
UPompeo uthi kodwa lokhu akunjalo emazweni amanengi womhlaba, ngakhoke eleMelika lizimisele ukusebenza gadalala lisebenzisa konke okusemandleni alo ukuvikela lokulondolozwa kwaleli lungelo eliqakatheke kangaka. Lokhu uthi kugoqela ukuveza amagama amazwe, lapho okwephulwa leli lungelo lokukhona abantu bekhululekile.
“EleChina kalihloniphi ilungelo labantu lokukhetha abafuna ukukholwa kukho. Ukwenza kukahulumende kokungakholwa kuNkulunkulu okuvezwa linyathelo lakhe lokukhipha imibhalo yeMilayo Elitshumi kaSomandla, esebhayibhilini, efaka imibhalo kaGeneral Secretary Xi, ukuvalelwa bengathoniswanga kwabantu besiUyghurs abanengi lokunye okunengi ecabanga ukuthi umhlaba kawuboni. Konke lokhu kusemehlweni womhlaba sikubhekile.”
Eminyakeni emibili edluleyo, uPompeo uthi ugatsha lwakhe olweState Department, luqoqe imihlangano emibili yenkokheli yamabandla ezenkolo ehlukeneyo eye Ministerials to Advance Religious Freedom. Limihlangano ibuthanise inkokheli yamabandla okholo ehlukeneyo abanjengabafundisi labanye, ukuze baxixosane ngokulondolozwa kwelungelo lomuntu wonke emhlabeni jikelele ukuzikhethela afuna ukukholwa kukho.
EleMelika uthi njengelizwe liyaziqhenya ngokuba lembali enhle kusukela lelo lizwe lithola uzibuse yokulondoloza ilungelo lomuntu wonke lokuzikhethela inkolo angafuna ukuyilandela okwahle kwafakwa lakusisekelo sombuso welizwe ngabasungula leli lizwe.
Your browser doesn’t support HTML5
Udaba oluveza imibono kahulumende weMelika