Osemelele ukuqala umsebenzi wokuba nguMongameli weMelika uMnu Joe Biden izolo wethulele uzulu umphathintambo wakhe obona ngezomvikela.
UBiden ukhethe onsude uGeneral Lloyd Austin yena ophume kubutho ngo2016.
Umthetho uthi ongena kulesisikhundla kumele abe eseleminyaka eyisikhombisa waphuma kubutho.
Kodwa njengoba uAustin eleminyaka emine nje kuphela, uBiden uthe uzacela idale leCongress ukuthi liyekethise limvumele njengalokhu elakwenza kumphathintambo owakhethwa nguMongameli Donald Trump ngo2017 uGeneral Jim Mattis.
Kodwa kukhanya kuzaba lukhuni ngoba bakhona ngitsho labebandla likaBiden elamaDemocrats abagoqela uSenator Elizabeth Warren labanye abaphikisa ukukhethwa kukaAustin.
Ocubungula ezombusazwe njalo engumsekeli kaBiden uMnu Den Moyo utshele iStudio 7 ukuthi uBiden wazifaka esimeni esilukhuni ngokukhetha uAustin yena ekwazi ukuthi umthetho awumvumeli.
Your browser doesn’t support HTML5
Ingxoxo loMnu Den Moyo