Inkisela yaseMelika edume ngokuphathisa abahluphekayo emhlabeni jikelele uMnu Bill Gates loNkosikazi wakhe uMelinda bathi sebesehlukana ngemva kweminyaka engamatshumi amabili lasikhombisa, 27, years betshadile.
UMnu Bill Gates nguye owasungula inkampani yama-computer iMicrosoft njalo loMelinda basungule inhlanganiso yeBill and Melinda Gates Foundation ngo2000 ngenjongo yokuphathisa abampofu emazwani asathuthukayo.
Kuze kube namuhla sebephathise abaswelayo ngemali engena kuUS$53.8 billion esetshenziswe kuhlelo zokudla, ezokutholisa abantu amanzi ahlanekileyo, ezempilakahle lezinye ezitshiyeneyo.
Kumbiko abawethule ngoMvulo, ababili laba bathe lanxa sebesehlukana, bazaqhubeka besebenza bonke kunhlanganiso yalo le.
Ohlaziya ezombusazwe uMnu Den Moyo utshele iStudio 7 ukuthi ngempela ubona ababili beqhubeka besebenza bonke kunhlanganiso yabo njalo bephathisa abaswelayo njengenhlalayenza.
Your browser doesn’t support HTML5
Ingxoxo loMnu Den Moyo