Udaba Lokudinga Ozelama Umsekeli Kamongameli Ludabula iZanu PF

  • Chris Gande

Owayengumsekeli kamongameli, Umnu. John Landa Nkomo.

Udaba lomuntu ozakwelama umsekeli kamongameli, uMnu. John Landa Nkomo selutshiye ibandla le Zanu PF liphakathi kokudonselana esigabeni sako Bulawayo.

Phansi kwesivumelwano esenziwa phakathi kwebandla le Zanu PF lele PF Zapu kulesiqondiso esingalotshwanga esokuthi omunye umsekeli kamongameli kumele avele kubandla le PF Zapu.

Kodwa bakhona abanye abaku Zanu PF abafana lomphathintambo wezemithetho, uMnu. Emmerson Mnangagwa, abathi lesi sivumelwano sesiyingebhezi nje kuphela okutsho ukuthi asisalandelwa.

Esikhathini esedluleyo umgcinisihlalo webandla nguye obehle aphiwe lesi sikhundla kodwa abanye ababengabe PF Zapu bathi uMnu. Simon Khaya Moyo kamelanga aphiwe lesisikhundla lanxa engumgcinisihlalo ngoba bekhona abadala kulaye ebandleni leli.

Abanye abafuna lesi sikhundla ngamalunga edale lepolitburo oMnu. Naison Khutshwekhaya Ndlovu, Phekezela Mphoko lomphathintambo wendaba zasekhaya, uMnu. Khembo Mohadi.

Umgcinisihlalo webandla le Zanu PF ko Bulawayo uMnu. Naison Ndlovu utshele iphephandqaba le Zimbabwe Mail ukuthi idale le coordinating committee lizakwenza umhlangano wokukhetha igama lomuntu oyedwa elizakhwezwa emhlanganweni we Congress ngenyanga ka Mpalakazi.

Ilunga lebandla le Zanu PF uMnu. Morris Ngwenya, njalo oyingcwethi ecubungula ezombusazwe, utshele iStudio Seven ukuba lamagama amanengi abafuna lesi sikhundla kutshengisa ukuthi lelibandla lilombuso okhululekileyo.

Your browser doesn’t support HTML5

Ingxoxo loMnu. Brilliant Mhlanga

UMnu. Morris Ngwenya, lilunga lebandla leZanu PF njalo eyingcwethi ecubungula ezombusazwe. Ubekhuluma leStudio Seven ecingweni ese Harare.

Your browser doesn’t support HTML5

Ingxoxo loMnu. Morris Ngwenya

Siphinde saxoxa lengcwethi ecubungula ezombusazwe, uMnu. Brilliant Mhlanga ukuze sizwe imbono yakhe ngaloludaba.