Uhulumende weZimbabwe usephume ijumo ebamba imihlangano lozulu yokuzama ukuphuma lamasu angehlisa ubuyanga elizweni. Emhlanganweni wakoBulawayo, uzulu ubekhala ngokuthi akala sekelo alutholayo olwenelayo olusuka kuHulumende enhlelweni zonke zelizwe.
Umnumzana Kholisani Moyo
Isiphathamandla sogatsha lwezemali, uMnunzana Kholisani Moyo, uthi uhlelo lolu luzadonsa inyanga njalo bakhangelele ukuya endaweni ezimbalwa ezigoqela eNkayi Mzingwane lezinye.
Uqhubeke ethi Moyo uHulumende usazophuma njalo ijumo lokudinga amasu kuhlelo oluzadonsa okweminyaka emibili.
UNkosikazi Judith Ncube, osebenza lenhlanganiso zabomama kukhansili yakoBulawayo ubike ukuba indleko kunye lemithetho ekhona iyancindezela ukuthuthuka kwabo.
Unkosikazi Jenni Wiiliams esemhlanganweni wokwehlisa ubuyanga ebantwini
UNkosikazi Jenny Williams okhokhela inhlanganiso yeWoza yena uthi ubuyanga bubhahile eZimbabwe njalo ukusweleka kwemali yikho lakho okwengezelela ubuyanga.
Umnumzana Davison Masendeke umlimisi
Umlimisi wohlangothi lwe AREX, uMnunzana Davison Masendeke uthi indlala isidale ubuyanga ezweni ngoba abalimi abala mali yokuthenga okokulimisa.
Umnumzana Butler Thambo
Okugcizelelwe yingcwethi yezenotho koBulawayo, uMnunzana Butler Tembo ethi uhulumende udlalisa imali enika ugatsha lwezomvikela encitsha olwezokulima.
Uzulu wakoBulawayo ubikele uhulumende imicijo embalwa emayelana lezifiso zakhe kwezempilakahle, ezokulima, ezokuguquka komkhathi, isisekelo sombuso, abasakhulayo ukulinganiswa kwamathuba kwabesiazana, okwezindlu lokunye. Laloba beveze izifiso zabo abantu bathi bazakholwa uhulumende esephenduka ezobika ukuba yiziphi inhlelo azazenza ekwehliseni ubuyanga.
Umhlangano wokudinga amasu wokuqeda ubuyanga
UBulawayo lokhe ebhekane lokusilela kwemali emabhanga, inengi lamabhanga akoBulawayo alokhe elendwendwe zabantu abalinde ukuthatha imali zabo abazigcinisileyo.
Your browser doesn’t support HTML5
Udaba lwemihlangano kahulumende yokudinga amasu okuqeda ubuyanga siluphiwa nguNompumelelo Moyo