Uhulumende ubikwa edinga indlela zokwenqabela ukusetshenziswa mahlayana kobulembu kulandela imbiko kaMongameli Robert Mugabe eyokuthi kumele kwenziwe njalo ngoba sebebanengi abasebenzisa ubulembu ngendlela ezingalunganga.
Sikhulama nje kulabantu abambalwa asebeke babotshwa ngoba bethumelane imbiko ethiwa igcono uMongameli Mugabe.
Ngeviki edluleyo iWhatsapp yazise ukuthi imbiko ethunyezwa ngalindlela yokuthumela imbiko kayisoze iphanjulwe ngabangayithunyelwanga.
UMongameli Mugabe uthe evela kwele Japan kunsukwana ezisanda kwedlula wazisa ngokudana kwakhe ngabasebenzisa ubulembu ngendlela ezingalunganga esithi kumele kudingwe indlela ezifana lezenziwa ngele China zokuvimba ukusetshenziswa mahlayana kobulembu.
Umphathintambo wezokwethulwa kwembiko lobungcitshi bendlela zokwethula imbiko, uMnu. Supa Mandiwanzira utshele iStudio Seven ukuthi mpela zikhona indlela abazikhandayo kodwa abamele bethuke yilabo abangasebenzi ubulembu ngendlela eziqotho.
Ukuhlaziya loludaba sixoxe lengcwethi yezokwethulwa kwembiko njalo engumhleli wephephandaba le The Independent, uMnu. Dumisani Muleya othi okufuna ukwenziwa nguhulumende yikubuyisela muva ingqubelaphambili.
"Le imbiko iyasikhathaza iyasihlupha njengentathelizindaba ukuzwa ukuthi uMongameli Mugabe ufuna ukusebenzisa itechnology ukuvimba ukusetshenziswa kwembiko ebulenjini," kutsho uMuleya.
Your browser doesn’t support HTML5
Ingxoxo loMnu. Dumisani Muleya