Uhulumende uthi usengezelele izisebenzi zakhe zonke iholo ukuze zisizakale ebunzimeni obukhona elizweni njalo lababalisi benelise ukubuyela emsebenzini ngoMvulo.
Ugatsha lwePublic Service Commission (PSC) lwazise ngoMgqibelo ukuthi imali le ngeyokuncedisa nje izisebenzi kusakhulunyiswana kabanzi ngodaba lweholo.
Luthe njalo izisebenzi lezi zizathola limali ngeviki ezayo mhlaka 2. Kodwa kalutshongo ukuthi yimalini.
Umbiko lo uza ngesikhathi ababalisi sebenqume ukuthi kabasoze babuyele emsebenzini ekuvulweni kwezikolo ngoMvulo nxa bengengezelelwanga iholo lalingana leUS$520.
Inhlanganiso ezimela ababalisi zisole umbiko wePublic Service Commission lo zisithi kuyamangalisa ukuthi uhulumende ukhuluma ngokuthi wengezelele izisebenzi iholo kodwa engatsho ukuthi ngemalini.
“Asikayiboni leyomali lokuthi yimalini. Ngakho, sithi asibuyeli emsebenzini,” kutsho isiphathamandla senhlanganiso yeProgressive Teachers Union of Zimbabwe (PTUZ) uNkosikazi Nokuthula Hlabangana.
Your browser doesn’t support HTML5
Ingxoxo loNkosikazi Nokuthula Hlabangana
Amazwi akhe agcizelelwe yisiphathamandla senhlanganiso yeAmalgamated Rural Teachers Union of Zimbabwe (ARTUZ) uNkosazana Melissa Chingwanangwana.
“Imali leyi ayikhulunywana lokuthi yimalini. Kutshengisa ukuthi le yindlela yokuthi ababalisi babuyele emsebenzini sithi sesiphakathi sibone siphiwe okuyimadlala nje,” kutsho uChingwanangwana.
Your browser doesn’t support HTML5
Ingxoxo loNkosazana Melissa Chingwanangwana
Isiphathamandla seZimbabwe Teachers Association (ZIMTA) uMnu Sifiso Ndlovu yena uthe uhulumende udlala ngababalisi.
“I-Public Service Commission ikhuluma angani ngumuntu odlala ifejafeja,” kutsho uMnu Ndlovu.
“Nanku phela bekulomhlangano ngeviki edluleyo lapho ababemele batsho khona ukuthi bayengeza yini iholo kumbe hatshi. Leli eselisengezwa emsamo liholo elinjani?”
Your browser doesn’t support HTML5
Ingxoxo loMnu Sifiso Ndlovu