Uzulu weZimbabwe ukhathazekile, ngenkulumo kasibalukhulu webhanga elikhulu lelizwe ele RBZ, uDr John Mangudya yokuthi uhulumende uzokwethula imali yohlobo lwama Bond Notes kunsukwana ezilandelayo, ukuphathisa ekuqedeni udubo lokuswelakala kwemali elizweni.
Usibalukhulu weRBZ, uMnu. John Mangudya
Udubo lokusilela kwemali luqale ekupheleni komnyaka ophelileyo uzulu esehluleka ukuthola imali emabhanga. Kungalesi sizatho uhulumende esecabange ukudinga indlela zokuphathisa kulolo dubo.
Omunye wezakhamizi zeHarare, unkosazana Kudzayi Nyakudya uthi akaboni kusebenza lokho elizweni eseliphila ngokuthenga yonke impahla kwamanye amazwe.
Umnumzana Sifelani Nyathi yena ke uthi lokhu yisibonelo sokuba uhulumende weZanu PF usehlulekile ukulikhokhela leli lizwe.
Abantu bemele ukuthatha imali ebhanga le Cabs
Unkosikazi Nompilo Dladla, ophila ngokuthengisa ezitaladeni ze Harare, uthi kuyamkhathaza lokho osekukhulunywa nguhulumende.
Ekhuthaza uhulumende, unkosikazi Dladla ukuthi ayiphendukise imali yelizwe kanye lokubona ukuthi iyalandelwe imithetho yelizwe hatshi lokho okukhona manje lapho bekhona abazenzela santando, bephazamisa umnotho welizwe.
Your browser doesn’t support HTML5
Imbono yabantu ngemali yephepha eyamaBond Notes siluphiwa nguMavis Gama
Limali yephepha yama Bond Notes, izabuya ingama 2-5-10 le $20. Kodwa uzulu uthi ukhathazekile ngoba engela lwazi olwaneleyo ngokuthi kuzosiza ngandlela bani lokhu, esesaba ukuthi engxenye liqhinga likahulumende lalabo abalemali, ukuzinothisa.
Ukuhlaziya udaba lwemali yama bond notes, uSithandekile Mhlanga we Studio 7 uxoxe loMnu. Bulisani Ncube, ingcwethi ecubungula ezomnotho welizwe, endawonye losomabhizimusi uMnu. Albert Mhlanga, oyisiphathamandla sebandla lezombusazwe elePeople First.
UMnu. Mhlanga usungula lingxoxo ngokuchasisa ukuthi kungani imali yama bond notes ingasoze iqede udubo lokuswelakala kwemali.
Your browser doesn’t support HTML5
Ingxoxo LoMnu. Albert Mhlanga Endawonye loMnu. Bulisani Ncube