Ekhuluma emhlanganweni lentathelizindaba ngokuvunyelenwe edale labaphathintambo, umphathintambo wezokwethulwa kwemibiko, unkosikazi Monica Mutsvangwa uveze ukuba bavumelene ukuba umphathintambo wezempilakahle u Dr Obediah Moyo asebenzisane lomsekeli kamongameli umnumzana Constantine Chiwenga ukulungisisa udaba oseluhluphile lokukhalala umsebenzi kwabodokotela.
Umnumzana Lizwe Thodlana isakhamuzi se Harare ngomunye wabasola kakhulu lelinyathelo lokukhetha u Chiwenga ukuthi akhulumisane labodokotela.
Uthi ukunika uChiwenga lowo msebenzi yikuphosisa nxa kukhangelwa imbali yakhe esikhathini sangemuva ngesikhathi abongi bekhalala umsebenzi.
Esinye njalo isakhamuzi se Harare umnumzana Nkosikhona Dibidi uthi ukukhethwa kuka Chiwenga ukukhokhela ekukhulumisaneni labodokotela abakhalala umsebenzi kuliphutha elikhulu.
Unkosikazi Mutsvangwa uphinde wazisa ngolunye udaba abaluvumelane njengedale labampathintambo lokuba baxotshwe abahlezi ngaphandle komthetho emaphulazini.
Umphathintambo wogatsha olubona ngezomhlabathi lezokulima, u Retired Air Marsha Perence Shiri uchasisa kabanzi phezu kwaloludaba.
U Thodlana ulisole lelinyathelo eselifuna lokufuna ukususa ababikwa behlezi emapulazini okungekho emthethweni.
U Dibidi uthi kumele uzulu achazelwe ukuba abantu laba asebexotshwa babevele bephiwe ngubani lezo ndawo.
Okunye kokuvunyelenwe kulomhlangano owenziwa ngoLwesibili maviki wonke wequla labaphathintambo, unkosikazi Mtsvangwa utshele intathelizindaba ukuba kubalisa ukuguqulwa komthetho olawula ngezemfundo elizweni okuzosiza ukuthuthukisa uhlangothi lwababalisi abafundisa izifundo ze science.
Your browser doesn’t support HTML5
Udaba lwabodokothela siluphiwa nguMavis Gama