Kuhlelo Woza Friday silomculi wengoma zokholo uKnowledge Nkiwane yena oledlalade elivutha amalangabi elithiwa Lento kaJehova.
UKnowledge Nkiwane wathwetshulwa yingwe ngomnyaka ka 1981 ngenyanga kaNcwabakazi esibhedlela seMpilo koBulawayo kodwa ekhaya udabuka eNkayi eGwamba Valley endaweni ye Singeni.
Ukuhlabelela uqale esafunda eDlawa Primary School khonale eNkayi kodwa ezokucindezela uqale eseko Bulawayo ngomnyaka ka 2003 ehamba leqembu le Gospel Impact.
“Sengilamadlalade amahlanu, amathathu ngihamba leqembu le Gospel Impact abalisa elithi Sibonga uManuel, Khayelihle lethi Wethembekile, ngomnyaka ka 2014 sengihamba ngedwa ngikhuphe idlalade elithiwa UJesu Uyazi kwathi nyakenye ngasengikhipha leli elithiwa Lento kaJehova.
Umfoka Nkiwane usebenza eselizweni le South Africa kusukela ngomnyaka ka 2004 njalo lonyaka ukhethwe ukuba ancintise kuzigaba ezintathu kumncintiswano we Gauteng Gospel Music Awards.
Ukhethwe kuzigaba ezibalisa ese Best Male Artiste, Best Gospel Album kuthi ingoma okubizwa ngayo idlalade ethiwa Lento KaJehova ikhethwe ku Best Song of the Year.
Your browser doesn’t support HTML5
Udaba Esilathulelwe nguJoseph Njanji
Ensukwini ezedluleyo uNkiwane uke waphatheka emkhosini wengoma zokholo oqhutshelwe dolobheni le Gwanda njalo uthi abalandeli bomculo we Gospel bayawukhwabitha kakhulu umsebenzi wakhe.
“Ngifuna ukubonga kakhulu abantu bako Bulawayo, abantu base Gwanda lakwamanye amadolobho ngendlela abayamukele ngayo umculo kaKnowledge Nkiwane langendlela abawuthenga ngayo njalo sicela baqhubeke besisekela.”
Abafuna ukuxhumana lomfoka Nkiwane bayenelisa ukumbamba ebulenjini kukhasi le Facebook ngaphansi kwegama lakhe elithi Knowledge Nkiwane.