Uzulu seveze imbono etshiyeneyo phezu kwembiko kahulumende yokuthi uphakathi kokuphendla umhlahlandlela ozalandelwa kuhlelo lokugebha amathambo abantu ababulawa yiGukurahundi ukuze bangcwatshwe kakutsha.
Iphephandaba leChronicle libike izolo ukuthi ugatsha lwendaba zasekhala yilo olukhokhela loluhlelo lusebenza leNational Peace and Reconciliation Commission.
Udaba lolu luvusa umfutho ovele ukhona phezu kokubulawa kwabantu abedlula inkulungwane ezingamatshumi amabili eMidlands laseMatabeleland libutho leFifth brigade phakathi kuka1983 lo1987.
Lanxa abasekela uhulumende besithi ukugejwa kwamathambo lokhu kulinyathelo elihle elilakho ukupholisa amanxeba, abanye bayakusola kakhulu besithi uhulumende akaluphathi kuhle loludaba.
Ocubungula ezombusazwe uMnu Mqondobanzi Magonya utshele iStudio 7 ukuthi kunengi okusamele kwenziwe nguhulumende okufana lokuchasisela uzulu ukuthi vele babulawelwani abantu laba andubana kugejwe amathambo.
UMongameli Emmerson Mnangagwa, yena owetheswa icala lokuphatheka kulumbhuqazwe, uthi uphakathi kokukhulumisana lenhlanganiso ezibiza ngokuthi yiMatabeleland Collective phezu kokulungisisa loludaba.
Your browser doesn’t support HTML5
Ingxoxo loMnu Mqondobanzi Magonya
Uhulumende uthi ukugebha amathambo lawa kuyingxenye yesivumelwano sakhe uMnangagwa lalinhlanganiso lanxa nje abanengi beyisola ukuthi ayimeli abantu beMatabeleland.