Intathelizindaba zeZimbabwe zikhuthazwa ukuphatheka ngokugcweleyo kuhlelo lwe Humanitarian Information Centre - HIFC oluphathisa ngemali ukuloba indaba ezenza badingisise lokucubungula phezu kwendaba eziphathelene lenhlala kahle kazulu njalo kungezilohlonzi lwaphezulu, ngenhloso engenza abaphethe izikhundla batshaywe zinhliziyo bakulungisise lokho okutshiwo kulezo ndaba.
Intathelizindaba ezithole usizo phansi kohlelo lweHIFC lokuphathisa intathelizindaba ilizwe lonke, zitshengise ukulujabulela zisithi selubaphathise ukuloba indaba ezilohlonzi ezenza inkokheli zivuke zizama ukulungisisa okuphume kizo kulalokho obekade bekwenza ngaphambilini
Umgcinisihlalo we Board yalenhlanganiso uDr Reneth Mano, utshele abekade bekulomkhosi owenzelwe ehweteleni ye Cresta Lodge lamuhla ekuseni ethi lanxa umnyaka ka 2013 bewunzima, banelise ukuthola usizo kunhlanganiso ezivele ziphathisana labo, kusukela ngomnyaka ka 2011 lapho lwasungulwayo, ukutholisa intathelizindaba imali yokusebenzisa ukuze kulotshwe indaba eziliqiniso, ezijulileyo njalo ezilohlonzi. Uthi uDr Mano, basungula loluhlelo, ngokunanzelela izikhexe phezu kokulotshwa kwezindaba ngendlela engaphathisi uzulu.
Umkhokheli weHIFC, unkosikazi Virginia Muwanigwa, yena uthi ngaphandle kokunikeza izicoco kulabo abakhethiweyo, umkhosi walamuhla bawusebenzise njengendlela yokuzwa lokho okudinga ukulungisiswa yinhlanganiso yakhe ukuze luthuthuke loluhlelo.
UMuwanigwa uthi abenhlanganiso yakhe bakhuthaza njalo intathelizindaba ukuthi zizithuthukise kundlela ezibhala ngayo hatshi ukuqina ngohlangothi lunye njengoba sekule nguquko kundlela zokutholisa uzulu imibiko.
U Clemence Manyukwe nguye othole umvuzo wakuqala ngemva kokuloba udaba obeluphezu kwesimo esigabeni seChiadzwa ebonisa indubo uzulu walindawo abhekana lazo lanxa kuyiyona ndawo okulamatshe aligugu amadayimani.
Kuthi uJackie Mubayiwa – Makuvatsine uthole isicoco ngokuloba udaba phezu kobudlelwano obukhona phakathi kobuyanga lokulondolozwa kwemvelo.
Abasakazi uTheophelus Tshuma loEffort Magoso osebenzela umsakazo kamabonakude bathole izicoco ngendaba eziphezu kwesimo sabawelwa yingozi yokukhukhulwa kwemizi yabo lempahla eTokwe Mukosi.
U Andrew Kunambura yena uthole isicoco esivelele kwabe International Organisation for Migration ngemva kokuloba eveza okwenzakala kudaba lokuphuma kanye lokungena kwabantu elizweni bethwalwa ngabanye okungekho emthethweni –iHuman Trafficking.