Abaphatheke emikhankasweni yezempilakahle bathi kuqakathekile ukuqinisa ukusebenzelana phakathi kwentathelizindaba labacubungula phezu kwegciwane lengculaza okuzaphathisa ekuthini kuzwisiseke okwenzakalayo lapho kudingwa umuthi wokuqeda loludubo.
Lokhu ngokunye kokuvezwe ngoLwesihlanu emhlanganweni wakuqala we Science Cafe, owenzelwe eweteleni ye Ambassador, oqoqwe ngabenhlanganiso yentathelizindaba eziloba indaba zezempilakahle eye Health Journalists Association of Zimbabwe-HeJaz, bemanyene labenhlanganiso ebona ngezokukhankasela indlela zokwehlisa ukumemetheka kwegciwane lokuqedwa kwengculaza umhlaba wonke jikelele eye Advocates for HIV prevention to end AIDS.
Unkosazana Anna Miti ngomunye wabaphatheke kulemikhankaso kuhlangothi lokudinga indlela zokulwisana lokusabalala kwegciwane kanye lengculaza enhlanganisweni ye AVAC
Unkosazana Miti yena oyintathelizindaba njalo uthi lumanyano uqakathekile ngoba uphathisa ekuthini intathelizindaba zizwisise okwenzakalayo lapho kusenziwa imisebenzi yokucubungula ngaleli gcikwane.
Bezikhona njalo ingcwethi eziphatheke kwezokucubungula okuphezu kwegciwane lengculaza kuleli okubalisa u Dr Nyaradzo Mugodhi.
Kumqoka ukuba ziluzwisise intathelizindaba, loludaba lokucubungula, zizwisise ukuba ziyisima kanjani lezo zigaba ezilandelwayo lokuba uqhutshwa njani umsebenzi kutsho u Dr Mugodhi.
Zingatholiswa ulwazi olwaneleyo intathelizindaba, uDr Mugodhi uthi kuzaphathisa ekuthini zanelise ukufikisa umbiko oyiwo kuzulu, laye azwisise ukuqakatheka kwemisebenzi yokucubungula lokudinga indlela zokuqeda udubo lwegciwane lengculaza.
Kuzaphathisa njalo ekuthini uzulu azwisise ngokwaneleyo lolodaba kulotshwa ngalo, azi njalo okwenzakalayo sikhathi sonke kundaba zezempilakahle njalo anelise ukuzemukela inhlelo zokucubungula lapho ziqhutshwa, kungasoke kube yinto ezakumethusa kuveza uDr Mughodhi.
Umnumzana Thabani Dube ngomunye wamalunga alenhlanganiso yentathelizindaba eziloba ngezempilakahle eZimbabwe eye HEJAZ. UDube uveze ukuyithakazelela imihlangano yaloluhlobo.
Ziyasilela ezinye zalezintathelizindaba lapho ziloba okuphezu kwengculaza legciwane kungakho abe HEJAZ, bekubone kufanele baqhube imihlangano yaloluhlobo, ukuze kuvele ukuba ilizwe likusibanga siphi kwezokucubungula, kuveza u Dube.
Abaphatheke kwezokuqhutshwa kwenhlelo zokucubungula ngezegcikwane lengculaza kanye lemikhankasweni yokwamukelwa kwempumela yalokhu kucubungula labo bathi kuqakathekile lokhu kusebenzelana.