Umbukiso wezokuthengiselana oqale ngoLwesihlanu eMusina, ongenwe ngabesifazana abaqhuba amabhizimusi amancane laphakathi laphakathi kweleSouth Africa laseZimbabwe utshayelwe ihlombe ngokupha abesifazana laba amathuba okuthuthuka kwezamabhizimusi. Kulabesifazana abedlula amakhulu ayisithupha abakulo umbukiso bebukisa imisebenzi yezandla etshiyeneyo.
Abesifazana abaqhuba amabhizimusi amancane eZimbabwe lakweleSouth Africa bebethe gwaqa eMusina ngoLwesihlanu bebukisa izinto ezitshiyeneyo abazenzayo.
Inengi labavela eZimbabwe bebebukisa ezibazwayo, ukudla kwesintu, izikhwama zabo mama, ingubo, izigqoko lokunengi okwenziwa ngezandla. Unkosikazi Lucia Matiki odabuka eBeitbridge ngomunye wabesifazana abebe kulo umbukiso.
Yenake uthi ezibaziweyo aze lazo ezigoqela izitsha, izinyamazana lokunye okwenziwe ngesihlahla somvagazi, bekuthengwa njengamakukisi ebusika.
Ngakwelinye icele, imvunulo yesintu, izinto ezihlotshiswe ngamangqonqo, izilimo, ukudla, amasofa lokunye okufanayo yikho obekugcwele lapho abekubokisa khona omama bakweleSouth Africa. Unkosikazi Lona Rapoo, usuke eRustenburg waze wayawela eMusina elanda lo umbukiso.
Kulaba phathintambo besifazana abahlanu abangene lumbukiso ngelanga lakuqala. Umphathintambo wezamabhizimusi asakhulayo lezamakopa, unkosikazi Sithembiso Nyoni ube thabe emanzi te ngokuphumelela kwalo umbukiso.
Usowabo wakwele South Africa, unkosazana Lindiwe Zulu laye uwungcome kakhulu lumbukiso.
Umphathintambo wogatsha lwabesifazana lentuthuko yezabelo unkosazana Nyasha Chikwinya, loMphathintambo obona ngezezabelo unkosikazi Shuvai Mahova labo bebekhona kuvulwa lo umbukiso.
Lumbukiso owenzelwe edolobheni leMusina uqale ngoLwesihlanu mhlaka 4 Mpandula 2015 usiyaphela ngoMgqibelo mhlaka 5 Mpandula, 2015 kantike laba omama bathi lokhu kuzaba yisiqalo sokukhula kwamabhizimusi abo amancane esiba makhulu.