Isiphathamandla sogatsha lweCIO esibulawe ngamasotsha ekugenquleni kwawo umbuso kaRobert Mugabe nyakenye senzelwe isikhumbuzo ngumdeni waso eHarare ngoMgqibelo.
Umuyi uMnu Peter Munetsi ubikwa watshaywa ngamasotsha kabuhlungu waze wafela ezandleni zawo mhlala 15 ngoLwezi.
Esikhumbuzweni sakhe bekulokufuthelana okukhulu njalo inengi lisesaba ukukhuluma ngokufa kwakhe. Ngitsho lomkakhe uRose kathandanga ukukhuluma okunengi.
Kunakanelwa ukuthi banengi abantu ababesebenza kuhulumende bekungatsha zomvikela ababesekela uMnu Mugabe lecele leG40 ababulawa libutho ngesikhathi sinye loMunetsi.
Amanye amalunga edale lephalamende athi uMongameli Emmerson Mnangagwa kumele abizwe kulelidale azechasisa ngomonakalo owenziwa libutho aveze lokuthi bangaki abantu ababulawayo.
Kodwa ingcwethi ecubungula ezombusazwe uMnu Mqondobanzi Magonya utshele umsakazo weStudio 7 ukuthi akusoze kubelula ukuthi uMnangagwa awuveze umonakalo owabangelwa libutho.
Your browser doesn’t support HTML5
Ingxoxo loMnu Mqondobanzi Magonya