Inhlanganiso zemihloliso zibambe umhlangano wokuhluza ngendlela zokuquba imihloliso eHarare zihlose ukuphuma lendlela ehambelanayo emazweni wonke akumanyano wange zansi yezwekazi leAfrica kulandelwa izinqumo ze Sadc Protocol kwezemfundo.
Lumhlangano wenhlanganiso ezedlula ezilitshumi zemazweni angezansi kwezwekazi leAfrica owe Southern Africa Association of Educator Assessment Conference usungule eHarare ngoMvulo ungenwa yizikhwicamfundo lengcwethi kwezemfundo.
UDokotela Edmund Mazibuko ovele kwele Swaziland uthi umhlangano lo uqakathekile kakhulu ngoba utholisa ingcitshi lenhlanganiso zemihloliso ithuba lokuhluza umumo wezinto lokwebelana amacebo lolwazi ngokwenzakala emazweni atshiyeneyo.
Umsekeli kamphathintambo wezemfundo yePrimary le Secondary usikwicamfundo Paul Mavhima utshele lumhlangano ukuba bahluze indlela ezingenza ukuba imfundo etholiswa abantwana iphathise ekuthuthukisweni amazwe la kwezenotho ethi ele Zimbabwe lilenhlanhla ngoba umhlangano lo wenzelwa kilo ngesikhathi lilungisisa I-syllabus yalo ukuze ihambelane lentuthuko yabantu lezomnotho:
U Dokotela Mazibuko uthi umhlangano onje ubanikeza ithuba njalo lokuba babelane amacebo lokufundisana njengamazwe lenhlanganiso zemihloliso esipha isibonelo seZimsec yase Zimbabwe ukuthi isisebenzisa indlela yangalezi nsuku eye e-marking ekumakeni imihloliso.
Uqhubeke ethi okudanisayo yikuba amazwe akhuluma isi Portuguese afana le Angola le Mozambique akhanya ebhekana lobunzima ukungena imihlangano enje ngesikhathi kulemizamo eqakathekileyo yokugcwalisisa izinqumo ze Sadc Protocol kwezemfundo ezidinga ukuba indlela yemfundo lokuhlolwa kwayo ihambelane emazweni wonke akumanyano singakafiki kumnyaka ka 2018. Esithi kukhanya udubo lubangelwa yikutshiyana kwendimi phakathi kwesingulu lesi Portuguese.
Umhlangano lo oqale ngoMvulo uphela ngoLwesithathu, ungenwa zinhlanganiso lenhlangothi zemihloliso ezifana le Zimsec, UMalusi, National Exams and Assessment yase Namibia, labammeli bamazwe agoqela ele Lesotho, Malawi, Zambia, Botswana le Swaziland phakathi kwamanye.