UMongameli Emmerson Mnangagwa ngoLwesithathu wengeze isikhathi sokusebenza kukamahluli omkhulu uChief Justice Luke Malaba ngeminyaka emihlanu lanxa nje kulokuhlokoma phezu kwaloludaba kanti lamagqwetha lawo eseluphikisile enkantolo.
UMalaba ubemele aye kumpentsheni ngoMgqibelo mhlaka 15 lapho afikisa khona iminyaka yokuyaphumula engamatshumi ayisikhombisa, 70 years.
Kodwa ukuguqulwa kwesisekelo sombuso welizwe okwenziwe libandla leZanu PF lincedisana leMDC-T kaMnu Douglas Mwonzora kuphe uMnangagwa amandla okwengeza iminyaka yokusebenza kukaMalaba labanye abahluleli benkantolo eziphezulu.
Lokhu kutsho ukuba usezatshiya umsebenzi eseleminyaka yokuzalwa engu75.
Encwadini ayilobele uMalaba, unobhala ehofisini kaMangagwa uChief Secretary Misheck Sibanda uthe uMongameli ukuvumile ukuthi aqhubeke ngomsebenzi mhlaka 16 lapho obekumele ayephumula khona ngemva kokubona incwadi zakhe ezivela kudokotela ezikhomba ukuthi uphile kuhle emzimbeni lasengqondweni.
Kulamagqwetha athi okwenziwe nguMnangagwa akukho emthethweni.
Isicelo samagqwetha la esokuthi iHigh Court yesule inyathelo liMnangagwa sizahluzwa ngoLwesihlanu.
Ohlaziya ezombusazwe uMnu Mbuso Fuzwayo utshele iStudio 7 ukuthi uMnangagwa wengeze i-contract yakhe ngoba efuna amvikele kukhetho luka2023 alubana kuthe kwaba lokudonselana njengakukhetho luka2018.
Your browser doesn’t support HTML5
Ingxoxo loMnu Mbuso Fuzwayo
Kodwa abebandla leZanu PF labakuhulumende bayakulandula lokhu.