Owake waba ngusibalukhulu wesabelo seMashonaland West, uMnu. Peter Chanetsa, kasekho.
UChanetsa ubhubhe ngoMvulo esibhedlela se Parirenyatwa ngomkhuhlane ongakaqanjwa lapho akade eselatshwa khona kusukela mhlaka 23 ngoLwezi.
Isigaba sebandla leZanu PF eMashonaland West sibikwa sivumelene ukuba umuyi aphiwe isicoco seqhawe lesizwe ese National Hero, okuzakwenza ukuba nxa idale le Politburo livumile, ayebekwa emathuneni eNational Heroes Acre eHarare.
UChanetsa waba lodumo ngemva kokulobelana isivumelwana lenkampani yakwele Namibia ukuthi ithengisele ilizwe inhlanzi ezithiwa mackerel ngemali ephansi.
Kodwa wonalo umnyaka uChanetsa ugwetshelwe ukuhlala esitokisini ngemva kokwehluleka ukubhadala isikwelede sebhanga le Commercial Bank of Zimbabwe esingamadola azinkulungwane ezifika phose amatshumi amabili, $20,000 - kodwa wavumelana lebhanga leli ukuba uzabhadala kancane kancane okwenza engavalelwa ejele.
UChanetsa uke waxhophana leyinye inkokheli yebandla leZanu PF esigabeni sakhe ngemva kokwetheswa icala lokuthi usekela olunye uhlangothi lwebandla le Zanu PF kodwa yena walandula limbiko.
Sixoxe lesiphathamandla sebandla leZanu PF, uMnu. Joseph Tshuma, ukuze sizwe okunengi ngaloludaba.
"Ngokuzwa kwami engaphiwa isicoco seqhawe lesizwe ngoba imbali yakhe ikhomba ukuba ulesithunzi sokubekwa eNational Heroes' Acre," kutsho uTshuma.
Your browser doesn’t support HTML5
Ingxoxo loMnu. Joseph Tshuma