Umkhokheli weMDC-T uMnu. Morgan Tsvangirai uphakathi kohlelo lokukhulumisana lozulu wezigaba zonke zelizwe oluqale ngoLwesine.
UTsvangirai ukhangelelwe ukufika koZvimba ekhaya likaMongameli Mugabe ngempelasonto.
Isikhulumeli sebandla le MDC-T, uMnu. Obert Gutu utshele iStudio Seven ukuthi injongo yohlelo lolu yikwazisa uzulu ngomumo wezombusazwe elizweni, ikakhulu ukubhidlika komnotho welizwe.
UGutu wengeze wathi uTsvangirai uzachasisela uzulu ngokuzakeniziwa libandla lakhe nxa uhulumende engasathathanga amanyathelo okwenza ukuthi ukhetho luqutshwe kungela micabango yokuqilibezela.
"Sikahgelele ukuba uzulu aze ngobunengi azozizwela ngoba usekhathele ngomumo wezombusazwe," kutsho uGutu.
Ibandla leMDC-T lithi nxa kungalungisiswanga lokhu alisoze lingene kukhetho.
Umsekeli wesikhulumeli sebandla leli, uNkosazana Thabitha Khumalo uchasisa injongo yale imihlangano kungxoxo ayenze lomsakazo weStudio 7.
"Ubaba uTsvangirai ukhangelelwe ukuyaxoxisana lozulu esigabeni seMashonaland West kumalanga amane alandelayo," kutsho uMaKhumalo.
Your browser doesn’t support HTML5
Ingxoxo loNkosazana Thabitha Khumalo