Umongameli Emmerson Mnangagwa usekhuthaze amankampani eRussia ukuthi asungule amabhizimusi kweleZimbabwe ngoba umnotho welizwe usalele emuva ngenxa yezijeziso eleZimbabwe elazetheswa ngamazwe aphetsheya.
Umongameli Mnangagwa uhlangane labosomabhizimusi laba eceleni komhlangano weRussia-Africa summit ogqitshwe ngoLwesine, ekhatshwe nguMnu. Mthuli Ncube, osaphethe isikhundla sikamphathintambo obona ngezobudlelwano lamanye amazwe, kanye loMnu. Kazembe Kazembe, labanye.
Inkampani ye Wagons of Russia ibikwa isayinelane isivumelwano leye National Railways of Zimbabwe ukuthi incedise uLoliwe ukuvuselela izitimela zakhe, njalo ezakuqala zizalethwa eZimbabwe ngoZibandlela ngomnyaka ozayo.
Ngakwelinye icele inkampani yeRussia ebizwa ngokuthi yi Uralcal, ithi izancedisa eleZimbabwe kunhlelo zokuthuthukisa ezokulima lezokwenjiwa kwamatshe aligugu, njalo izasiza abalimi ngemvundiso ye fertilizer.
Lokhu kubikwa kuvezwe ngumkhokheli walinkampani, uMnu. Dimitry Mazepin, yena ohlangane lomongameli Mnangagwa.
Kambe lokhu kuzancedisa ilizwe kwezomnotho na? Ukuhlaziya loludaba, sixoxa loMnu. Walter Nsununguli Mbongolwane, ingcwethi ecubungula ezombusazwe ngaloludaba.
Your browser doesn’t support HTML5
Ingxoxo loMnu. Walter Nsununguli Mbongolwane