Umongameli Emmerson Mnangagwa usencome eleChina ngokusebenzelana lamazwe akuzwekazi leAfrica, agoqela eleZimbabwe, ngendlela yokuwathuthukisa, njalo uthi kufanele amanye amazwe omhlaba alandele lesi isibonelo.
UMnangagwa utshele umsakazo weChina Global Television Network eBeijing kweleChina emhlanganweni osaqhubeka kulelolizwe owe 7th Forum on China-Africa Cooperation Summit, ukuthi eleZimbabwe lizaqhubeka lisebenza lamazwe azimiseleyo, njengeleChina njalo alisoze lizihluphe ngalawo angafuni ubudlelwano lelizwe lakhe.
Your browser doesn’t support HTML5
Lalela Amazwi kaMongameli Emmerson Mnangagwa Ngokugcweleyo
Esinye isiphathamandla sikahulumende esikhaphe umongameli Mnangagwa, uMnu. Sibusiso Moyo uthi uhulumende weZimbabwe uzaqinisa inhlelo zokuthengiselana leleChina, okuzalethela ilizwe imali yakwamanye amazwe, yona esilelayo elizweni.
UMnu. Moyo ubephatheke emhlanganweni we Seventh Ministerial Conference of the Forum on China-Africa Cooperation (FOCAC) oqhutshwe ngempelaviki.
Okunye okucutshungulwa kulumhlangano zindlela zokuthuthukisa ezemfundo, ezempilakahle, ezokuthengiselana, ezokulondolozwa kwezemvelo, lokunye.
Ukucubungula loludaba, sixoxe loMnu. Bulisani Ncube, ingcwethi ecubungula ezombusazwe, yena othi ukusebenzelana kweleChina leleZimbabwe kungaletha inguquko kwezomnotho welizwe.
Your browser doesn’t support HTML5
Ingxoxo loMnu. Bulisani Ncube
Umhlangano lo uvulwe ngokusemthethweni ngoMvulo ngumongameli weChina uMnu. Xi Jinping , yena onguye onxuse inkokheli zamazwe akuzwekazi leAfrica kulumbuthano.