Odokotela abelapha uMongameli Donald Trump bathi usesizwa ngcono kakhulu njalo ulakho ukuphuma esibhedlela namuhla.
UTrump uhanjiswe esibhedlela seWalter Reed ngoLwesihlanu ngemva kokubanjwa umkhuhlane weCovid-19.
Odokotela bakhe baveze izolo ukuthi uke wavaleka kabili eseswela umoya ngempelaviki kodwa bamfaka emtshineni owenze waphefumule kuhle.
Bathi ngaphandle kwalokho, ukhanya ephola kuhle njalo nxa kungabanga lokunye okuhluphayo engaphuma namuhla.
Yena uTrump wethula umbiko enkundleni yeTwitter esithi uzwa ngcono njalo ebonga uzulu ngokumfisela ukusila ngokuphuthuma.
Uthe njalo ukuhlaselwa yilumkhuhlane kumenze wafunda izinto ezinengi ngawo, lanxa nje engacacanga ukuthi yiziphi.
UMongameli Trump uphume njalo ngemota esibhedlela izolo wabhoda phandle lapho obekugcwele abasekeli bakhe ebabingelela ngokubaphakamisela isandla esemoteni.
Umkakhe, uMelania labanye abaseduzane loTrump abagoqela iziphathamandla zikahulumende wakhe abafika phose itshumi labo babanjwe umkhuhlane lo.
Ukuhlaziya loludaba sixoxe lesizalwane seZimbabwe esihlala eTexas khonapha eMelika uMnu Raphael Mthombeni yena othi akaboni uTrump ekhuthaza abantu ukuthi bagqoke ama-mask lanxa nje esewugulile lumkhuhlane.
Your browser doesn’t support HTML5
Ingxoxo loMnu Raphael Mthombeni