Ukudonselana amandla kubandlai leZanu PF kuqhubekela phambili umphathintambo, uMnu. Jonathan Moyo emangalela emthethwandaba umsekeli kamongameli, uMnu. Emmerson Mnangagwa, esithi wasebenzisa ugatsha lwezokucubungula ukungethembeki, olwe Zimbabwe Anti-Corruption Committee ukumgcona.
Emaphepheni awethule emthethwandaba, uMoyo uthi abahleli bamaphephandaba kahulumende abalisa iHerald, Chronicle, Sunday News le Sunday Mail kumele labo bamhlawule imali ngoba bamgcona.
Sekuzamele uMnangagwa labaqanjiweyo emaphepheni kaMoyo bethule amaphepha okuphikisa uMoyo kungakedluli amaviki amabili.
IStudio 7 kayenelisanga ukuzwa ukuthi abaqanjiweyo laba bazathatha nyathelo bani.
“Kulobufakazi bokuthi uMnangagwa leziphathamandla zeZAAC bahlangana kabili bekhuluma ngodaba lokuthi bazangigcona njani phezu kodaba lolu,” kutsho uMoyo emaphepheni akhe.
UMoyo ubikwa watshaphaza imali yogatsha oluphathisa abemfundo yaphezulu olwe ZIMDEF efika inkulungwane ezingamakhulu amane, $400,000.
Kalanduli lokhu kodwa uthi wasebenzisa limali ukuthenga amabhayisikili enduna labosobhuku besigaba sakhe. Sixoxe lomsekeli wesikhulumeli sebandla leMDC-T, uNkosazana Thabitha Khumalo othi okwenziwe nguMoyo kutshengisa ukuthi abe Zanu PF abafuni ukuphathisa uzulu.
"Basidlalisela isikhathi nje kuphela kungakhathalekali ukuthi uzulu odubekayo uzwanjani," kutsho uMaKhumalo.
Your browser doesn’t support HTML5
Ingxoxo loNkosazana Thabitha Khumalo