Ukungena kukaNkosikazi Grace Mugabe kwezombusazwe kwamukelwe ngembono etshiyeneyo kulokucabangela ukuthi ujonge ukwemuka isikhundla somkakhe, uMongameli Robert Mugabe.
Inengi labasekeli beZanu PF likhanya selamukele umqondo wokuthi uNkosikazi Mugabe athathe intambo zokukhokhela uhlangothi lwabesifazana ngemva kokutshiyelwa isikhundla lesi nguNkosazana Oppah Muchinguri.
Ocubungula ezombusazwe uMnu Masimba Kuchera uthi indlela uNkosikazi Mugabe abe khankasa ngayo emhlanganweni ayigqibe ngeviki edluleyo imveza engumuntu olokunye okukhulu akukhangelelayo ngaphandle kokukhokhela uhlangothi lwabesifazana.
Okukhulu akukhangeleleyo lokhu kungaba yisihlalo sikaMugabe, kutsho abanye.
Kodwa okhokhela inhlanganiso yezakhamuzi zeChitungwiza eyeChitungwiza Progressive Residents Association uMnu Admire Zaya uthi noma isifiso singabakhona akaboni uNkosikazi Mugabe ephumelela kulokhu.
Emihlanganweni yakhe uNkosikazi Mugabe usole ukudonselana kuZanu PF, wachothoza njalo lomsekeli kaMugabe uNkosikazi Joyce Mujuru esithi ungumuntu omubi, ongethembekanga ojonge ukugenqula uMugabe embusweni.
Your browser doesn’t support HTML5
Udaba Lusethulwa NguMark Peter Nthambe
Abanengi bakhangele ngeso lokhozi ukuthi uNkosikazi Mujuru uzathatha manyathelo bani phezu kokulengiswa kwakhe nguNkosikazi Grace Mugabe.
UNkosikazi Mujuru yena kakawuvuli owakhe phezu kokuthukwa konke lokhu.
Emihlanganweni yakhe, uNkosikazi Mugabe ubehamba leziphathamandla ezikucele leZanu PF elikhokhelwa nguMnu Emmerson Mnangagwa, lona elilwisana lelikhokhelwa nguMujuru.
Ukuhlaziya okwenzakala kuZanu PF sixhume ingcwethi kwezombusazwe eyaba ngumuntu wakuqala ukuloba ngokuthi uNkosikazi Mugabe uzangena kwezombusazwe, uMnu Dinizulu Macaphulana.
Your browser doesn’t support HTML5
Ingxoxo LoMnu Dinizulu Macaphulana