Ukutshengisela kwabeMDC-T eHarare bekhonona ngokunyamalala kwamabillion alitshumi lanhlanu amadola-$15billion lezinye inhlupho ezibhekane lozulu weZimbabwe kubikwa kuphumelele okwamagama ngobaabantu beze ngobunengi.
AbeMDC-T betshengisela
Inane lababuyileyo abanye bebesithi babe zinkulungwane ezinhlanu laloba bona abebandla leMDC-T elikhokhelwa ngumnumzana Morgan Tsvangirai bebesithi babe zinkulungwane ezilitshumi zabantu.
Abanye bamtshayela ihlombe uTsvangirai ngokuthatha leli nyathelo lokuqoqa abasekeli bebandla lakhe bebanengi kangaka ukungena emigwaqweni betshengisela, kodwa abanye njalo bebemsola besithi ngabe unxuse wonke muntu hashi abebandla lakhe kuphela, njalo angazakhuthaza abantu ukuthi bagqoke izembatho zebandla zombala obomvu.
Ukuhlaziya lolu daba uPraxedes Jeremiah ube lengxoxo lomunye wabalwela amalungelo oluntu unkosazana Nyari Mashayamombe endawonye loDumisani Muleya intathelizindaba elodumo.
AbeMDC-T betshengisela
Unkosazana Mashayamombe ngomunye wabasola ukuthi kungani uTsvangirai engamanyanisanga abantu hatshi ukubabandlulula ngokuthi ngabebandla liphi lezombusazwe.
"Ngubani ongafuniyo ukuba kwazi ukuthi i$15billion yayangaphi? Izizalwane zonke zeZimbabwe loba bona abeZanu PF bafuna ukubakwazi ukuthi sathwala nzima kanje khona kulemali engabe yancedisa ukuthuthuykisa ilizwe lethu. Mina ngithi loludaba malungabi ngolukaTsvangirai lebandla lakhe kuphela kodwa lube ngolomuntu wonke weZimbabwe" kutsho uMashayamombe.
Abasekeli beMDC-T
UMuleya yena uthi "Yebo yee, ludaba lomuntu wonke weZimbabwe kodwa phela leli nyathelo lifuna oyabe ekhokhela owaziwayo phakathi kukazulu, okuyikho okwenziwe nguTsvangirai. Uthethe inyathelo lakuqala njalo asivumenini ukuthi wenze kuhle njalo simtshayele ihlombe"
Your browser doesn’t support HTML5
Ingxoxompikiswano phezu kokutshengisela kwabeMDC-T eHarare