Umongameli weTogo uphelekezelwe ngomunye wakhe weZimbabwe bebhoda bebuka obe kusezithandeni ezimbalwa zababukisa kuZITF lonyaka ngaphambilini kokuvulwa lumbukiso okusemthethweni oqale ngoLwesibili.
Umongameli Robert Mugabe lomongameli Faure Gnassingbe weleTogo
Inengi labaxoxe leStudio 7 bathi umbukiso walonyaka muhle ngempela nomanje inani labazobukisa kunye labazobuka bebalutshwane.
Abantu bebekhala njalo ngobude bendwendwe zokungena embukisweni emide. Osomabhizimisi bona baveze ukujabulela indlela umbukiso oqhuba ngayo bethi bazaphenduka njalo kowomnyaka ozayo.
UNkosikazi Sandra Nyosi usomabhizimisi obukisayo lonyaka, ubike ukuba uthole ibhizimusi njalo ngomnyaka ozayo ulakho ukuphindela azobukisa.
Kuthi uNkosikazi Beauty Dlamini okubhizimusi lamaluba ubike ukuba useleminyaka edlula elitshumi ehlela amaluba ezithandeni zababukisayo njalo useleminyaka emibili ehlela amaluba kunkampani kamongameli weZimbabwe eyochago iAlpha and Omega. UNkosikazi Dhlamini uchaze ukuba ibhizimusi limhambele kahle njalo uyeza ngomnyaka ozayo.
Abasekeli beZanu PF bemelele umkhokheli wabo uMugabe kuHall 5
Ukhomishina obona ngezokhetho eZimbabwe, uMnunzana Qhubani Moyo laye uchaze ukuba bayabukisa bechasisela uzulu ngezokhetho asebeqalile ukululungiselela oluka 2018.
Lonyaka abalimi badanile ngoba inani lezifuyo ezibukiswayo ziphansi kakhulu. Umlimi ofuya inkomo ephulazini lakhe eliseNorton, uMnunzana Muchero Tichaona uchaze ukuba abalimi babhekane lobunzima njalo lonyaka izifuyo zilutshwana ezibukiswayo ngenxa yomkhuhlane womkhono ohlasele ilizwe.
Unkosikazi Noreen Dube ubike ukuba uyethemba ukuthi elakusasa leZimbabwe lizaba lihle ngenxa yabosomabhizimisi abaqunge isibindi bazobukisa lonyaka lobanje isimo elizweni singamanga kuhle.
Ababukisayo bakwele Russia
Lonyaka ukuvulwa kombukiso kuphuzile kancane kuvulwe ngemva kwemini. Amapholisa, abafundi abamatshayo labanye abatshiyeneyo bebejabulisa uzulu ngemidlalo etshiyeneyo.
Osomabhizimisi abasuka eBotswana abayisifica munwe munye labo bebebukisa kuthi okhokhela iqula labosomabhizimisi laba, uMnunzana Temo Ntapu ongumqondisi wezokuthengisela phandle kwelizwe ebika ukuba osomabhizimisi belizwe lakhe bathole ibhizimusi njalo uma imali ivuma ngomnyaka ozayo bazakwengeza inani labosomabhizimisi abazabuya labo ngoba bona bahlawula indawo yokubukisa kuthi osomabhizimisi bazihlawulele indleko eyokuhamba lalapho abazahlala khona.
EleRussia lalo elize labosomabhizimisi abambalwa abathi ngempela bayaqala ukuzobukisa ezwekazi leAfrica ngakho bakhangelele ukuthola ibhizimisi. Umnini wenkampani elungisa impahla zokulimisa osuka eRussia, uMnunzana Arkhipov Mikhal ubike ukuba bayajabula ngebhizimisi abalitholileyo eZimbabwe.
Indwendwe zabantu abakade befuna ukungena embukisweni weZITF, ngoLwesihlanu emini yantambama belokhe zizinde ngoba lumbukiso uphela ngoMgqibelo.
Your browser doesn’t support HTML5
Udaba lokuvulwa emthethweni kombukiso oweZITF siluphiwa nguNompumelelo Moyo
Ngakwelinye icele, ibandla eliphikisayo elePeople’s Democratic Party lithi ukungabikhona kwamankampani amakhulu embukisweni walonyaka njengakweminye iminyaka esanda kwedlula kuveza ukuthi umnotho weZimbabwe uqhubeka usonakala.
UNtungamili Nkomo oweStudio 7 uxhume isiphathamandla salelibandla uMnu. Edwin Ndlovu yena oke wayafika embukisweni oweTrade Fair osola kakubi lumbukiso esithi kawusela hlonzi.
“Lumbukiso kawusela sithunzi ngitsho lakancane, usuzifananela lomkhambo weFlea Market, engasekho amankampani amakhulu ayevame ukuzobukisa eTrade Fair, usuyinhlekisa njalo usuyangisa idolobho lakoBulawayo”
Your browser doesn’t support HTML5
Ingxoxo lomnumzana Edwin Ndlovu owebandla lePDP esola iZITF yalonyaka