Uzulu labamabandla aphikisayo ayakhonona kulandela imbiko eyethulwe lugatsha olubona ngezemithetho oluthi sekulicala ukuthengisa iflag yeZimbabwe kumbe ukulungisa yiloba yini okulomfanekiso wayo ngenjongo yokuthengisa nxa umuntu engela mvumo.
Lolu gatsha luxwayise uzulu ukuthi isigwebo sokwephula lumthetho yikuhlala ejele okwenyanga eziyisithupha kumbe ukuhlawuliswa imali engena kumakhulu amabili amadola.
Uzulu uthi uhulumende ukhanya sezama ukulwisana lemikhankaso ephikisa umbuso kaMongameli Mugabe esebenzisa iflag yeZimbabwe njengophawu lwayo efana le#ThisFlag.
Olwela ilungelo loluntu, uMnu. Mbuso Fuzwayo, owenhlanganiso ye Bhetshu Likazulu, utshele iStudio 7 ukuthi kuyamangalisa ukuthi uhulumende engaqala khathesi ukwalisa uzulu ukuthengisa iflag.
"Udaba lwe flag ngibona angani usizi oselukhona yikuthi abantu iminyaka yonke yonaleyi iflag itshaphaziwe ngenxa yokuthi umuntu kade eyabe eyifake emoteni yakhe ubengamiswa ngoba ubethathwa njengomuntu webandla elibusayo," kutsho uFuzwayo.
Uthi njengoba abantu sebethathe iflag bayenza eyomuntu wonke, uhulumende secunukile.
UFuzwayo uthi kumele abantu bengavumeli inyathelo leli.
"Akula ngenye indlela ngoba ungezwa kuthiwa kulelizwe eselithethe iflag layenza ingabi loncedo ungakhangela izikolo sekulokuyi piece okuncuncu," kutsho uFuzwayo.
Your browser doesn’t support HTML5
Ingxoxo loMnu. Mbuso Fuzwayo