Inengi labantu esigabeni seMatabeleland South lithi lilethemba ngekusasa yakuleli kulandela umbiko owethulwe ngumongameli omutsha weZimbabwe, uMongameli Emmerson Dambudzo Mnangagwa.
Kodwa abanye bathi balokudana ngokungaphathwa kodaba lombhuqazwe weGukurahundi.
Inengi lithi nxa uMongameli Mnangagwa engaqina ngamazwi akhe ilizwe leZimbabwe lingaba lekusasa engcono.
UNkosazana Sichasiselo Ndlovu, okhokhela inhlanganiso yabatsha eye Community Youth Development Trust, uthi uthabe wabamanzi nte esizwa uMongameli Mnangagwa esithi uzavula amathuba omsebenzi.
UNkosazana Julieth Nkiwane owe Women Association of Zimbabwe utshayele uMongameli Mnangagwa ihlombe esithi njengomama uyajabula ukuzwa ukuthi kuzakuba lemisebenzi ngoba abantwana behlezi emakhaya.
Udaniswe yikuthi uMnangagwa kakhulumanga ngokubhekane lasesifazana.
UMongameli Mnangagwa uthe ubugwelegwele sobumele buphule du elizweni kodwa uMnumzana Petros Mukwena owebandla le People’s Democratic Party uthe ukufumbathisana akhuluma ngabo benzakala ngaphansi kwamehlo kaMnangagwa.
Abanye ngabathi uMongameli Mnangagwa ebengeke akhuluma ngazo zonke inhlupho zelizwe njalo kuyadingeka ukuba anikezwe ithuba lokusebenza.
Your browser doesn’t support HTML5
UMnangagwa Uthi Uzazama Ukuthi Kubelemisebenzi eZimbabwe
Umgcinishlalo webandla le MDC-T uMnu. Lovemore Moyo utshele uSithandekile Mhlanga weStudio 7 ukuthi indlela uMongameli Mnangagwa azabusa ngayo izavezwa yizenzo hatshi amazwi akhe kuphela.
Your browser doesn’t support HTML5
Ingxoxo LoMnu. Lovemore Moyo