Uzulu uthukuthela phezu kwamazwi esiphathamandla sogatsha lwezithupha, uMnu. Tobaiwa Mudede, othi uhulumende kavumelani lemigqa yesisekelo sombuso esitsha evumela izizalwane zeZimbabwe ezihlala kwamanye amazwe ukuthi zibe lobuzwe obumbaxambili, idual citizenship.
Isisekelo sombuso sithi isizalwane seZimbabwe kasilahlekelwa yibuzwe baso ngoba sesilobuzwe belinye ilizwe.
Izizalwane zeZimbabwe uMnu Trevor Ncube loMnu Mutumwa Mawere sebeke baya emthethwandaba ngemva kokuhluthunelwa ubuzwe babo ngoba sebehlala eSouth Africa, umthethwandaba wanquma ukuthi kumele babuyiselwe ubuzwe babo.
Iphephandaba leChronicle lithi uMudede utshele umhlangano weZanu PF ngoLwesibili ukuthi uhulumende kasoze afake umthetho weCitizenship Act kusisekelo.
Uthe njalo isisekelo sombuso sizaguqulwa sitsho ukuthi ubuzwe obumbaxambili abuvunyelwa. UMudede uthi ukuvukela umbuso, iterrorism, ngesinye sezizatho ezenza bathathe lelinyathelo.
Le yinto esicunule abantu abanengi ngitsho lamalunga eZanu PF, ikakhulu ahlala phandle kwelizwe afana lomgcinisihlalo webandla leli eUK, uMnu Nick Mangwana.
Obona ngezemithetho kubandla linye, uMnu Munyaradzi Paul Mangwana, laye utshele iStudio 7 ukuthi okukhulunywa nguMudede kakwazi ukuthi kuvela ngaphi ngoba kungayisiyonto evunyelwane libandla.
Kodwa umkhokheli weZanu PF edale lephalamende, uMnu Lovemore Matuke, yena othe amazwi kaMudede kuqondile; okuveza sobala ukuthi lawo amalunga eZanu PF adabukene phakathi phezu kodaba lolu.
Uzulu weZimbabwe ohlala kwamanye amazwe uthukuthele ngaloludaba.
Igqwetha uMnu. Lucas Nkomo, yena uthi okuzanywa nguMudede leZanu PF yikungahloniphi umthetho.
Your browser doesn’t support HTML5
Ingxoxo loMnu Lucas Nkomo
Amazwi kaNkomo agcizelelwe ngumqoqi wenhlelo zeMDC-T njalo elilunga ledala lephalamende uMnu Abednico.
Your browser doesn’t support HTML5
Ingxoxo loMnu Abednico Bhebhe