Inengi labantu belisezitaladini koBulawayo ngoLwesithathu livalelisa umuyi uWillard Khumalo owayedlalela iqembu lenguqu eleHighlanders, kanye lelama Warriors obhubhe ngeNsonto, lapho imuli yakhe kanye labangani bekhaphe isidumbu sakhe ebesisuswa edolobheni siqondiswe ngakibo eMzilikazi ngaphambilini komngcwabo ngoLwesine.
Umuyi ukhangelelwe ukungcwatshwa eLady Stanley Cemetery KoBulawayo, lapho okungcwatshwa khona ababeyizakhamizi zalelidolobho abaphathisa ukulithuthukisa, njalo lapho okwangcwatshwa khona ababedlala loKhumalo, abagoqela uMercedes “Rambo” Sibanda, Adam “Adamsky” Ndlovu, kanye loBenjamin Konjera .
Owayengumgcinisihlalo weqembu leHighlanders njalo oyisikhulumeli semuli yakoKhumalo uMnu. Earnest Maphepha Sibanda uthi kubelomthandazo we memorial service koKhumalo ngoLwesithathu ntambama.
Wengezelele wathi umgcinisihlalo wenhlanganiso yePremier Soccer League uMnu. Twine Phiri kanye lababedlala umdlalo wenguqu lomuyi uKhumalo abavela endaweni ezitshiyeneyo zelizwe bazabe bekhona ngoLwesine kubekwa umuyi.
Your browser doesn’t support HTML5
Ingxoxo LoMnu. Earnest Maphepha Sibanda